Афғонистонда аввалги йиллардаги қуролли можаролардан қолган портловчи снаряд ва ўқ-дорилар тинч аҳоли ҳаётига жиддий хавф солмоқда, дея ёзмоқда "zamon.uz".
Афғонистоннинг Кунар вилоятида содир бўлган бир нечта портлашлар оқибатида икки нафар тинч аҳоли вакили ҳалок бўлди, саккиз киши эса турли даражадаги тан жароҳатлари олди.
Маҳаллий манбаларга кўра, Нур-Гул ва Асмар туманларида фожиали ҳодисалар қайд этилган. Хусусан, Нур-Гул туманида турар жойлардан бирида қўлда ясалган портловчи мослама портлаши оқибатида бир нафар бола ҳалок бўлган. Асмар туманида эса яна бир портлаш содир бўлиб, унинг натижасида бир нафар аёл вафот этган.
Вилоят полицияси хабарига кўра, жароҳатланганлар зудлик билан тиббий муассасаларга етказилган, айрим жабрланувчиларнинг аҳволи оғирлигича қолмоқда.
Таъкидланишича, минтақада ўнлаб йиллар давом этган қуролли тўқнашувлар оқибатида турар жой ҳудудлари яширин портловчи воситалар билан тўлиб кетган. УНИСEФнинг сўнгги ҳисоботларига кўра, Афғонистонда ҳар ой ўртача 55 киши урушдан қолган портловчи буюмлар туфайли ҳалок бўлмоқда. Қурбонларнинг қарийб 85 фоизини болалар ташкил этади.
Шунингдек, вазият вилоятларда хавфсизлик билан боғлиқ умумий кескинлик фонида янада мураккаблашмоқда. Жумладан, шу ҳафта Тахор вилоятида олтин қазиб олиш билан боғлиқ қуролли тўқнашувлар оқибатида яна тўрт нафар шахс ҳалок бўлгани маълум қилинди.
