Президент Шавкат Мирзиёев ташқи сиёсат ва дипломатик ваколатхоналар фаолиятига бағишланган йиғилишда АҚШдаги мавсумий ишчилар дастури доирасида Ўзбекистон фуқаролари учун янги имкониятлар яратиш зарурлигини таъкидлади.
Қайд этилишича, ўтган йили АҚШ ҳукумати қишлоқ хўжалиги соҳасида ишловчи мавсумий ишчилар учун махсус визалар бериш тартибини соддалаштирган. Шу муносабат билан Ўзбекистоннинг АҚШдаги элчисига мамлакатни мавсумий ишчилар жалб қилинадиган давлатлар рўйхатига киритиш бўйича музокаралар олиб бориш топширилди. Бу келгусида ўзбекистонликларнинг АҚШда қонуний ва ташкиллаштирилган тарзда ишлашига хизмат қилиши мумкин.
Шунингдек, бундан буён ҳар бир вилоят ҳокими ишчи кучига эҳтиёж сезаётган ривожланган давлатлар ҳудудлари билан тўғридан тўғри ҳамкорликни йўлга қўйиши кераклиги айтилди. Бу меҳнат миграциясини аниқ эҳтиёж ва реал буюртмалар асосида ташкил этишга қаратилган.
Президентга кўра, эндиликда элчилар хорижда юқори даромадли иш ўринларини топиш, фуқароларни зарур касблар ва хорижий тилларга ўқитиш жараёнларига ҳам масъул бўлади. Шунингдек, Япония, Швеция, Норвегия, Болгария, Австрия, Хорватия, Словения, Сербия, Греция ва Уммон билан меҳнат миграцияси бўйича ҳукуматлараро ва идоралараро битимлар имзолаш муҳимлиги қайд этилди.
Йиғилишда 2017 йилдан буён хорижий давлатларда 16 та янги дипломатик ва консуллик ваколатхонаси очилгани, уларнинг умумий сони 60 тага етгани, дипломатик алоқалар ўрнатилган мамлакатлар сони эса 165 тага чиққани ҳам маълум қилинди.
