Жорий йилнинг 19 январь кунига ўтар кечаси Тошкентда кўп қаватли уйларнинг бирига эркак ноқонуний кирмоқчи бўлгани акс этган видео ижтимоий тармоқларга сиздирилди. Ушбу ҳолат юзасидан ушбу шахс қўлга олиниб унга нисбатан суд иши кўриб чиқилди.
Жорий йилнинг 22 январь куни жиноят ишлари бўйича Юнусобод туман судида ҳуқуқбузар И.Т.га оид маъмурий иш кўриб чиқилди.
Суриштирув органи томонидан, фуқаро И.Т. 2026 йилнинг 19 январь куни Тошкент шаҳри Юнусобод тумани 11-мавзе 37-уй йўлагига кириб, уйнинг 28 ва 33-хонадонлари кириш эшигини бир неча маротаба куч ишлатган ҳолатда очишга уриниб, у ерда яшовчи фуқароларнинг тинчлигини бузган.
Шунингдек, судланувчи жамиятда юриш-туриш қоидаларини қасддан менсимасдан, фуқароларнинг осойишталигини бузганлиги аниқланиб, ҳолат юзасидан унга нисбатан тегишли тартибда маъмурий ҳуқуқбузарлик тўғрисидаги баённома расмийлаштирилган.
Суд ҳукмига кўра, судланувчи И.Т. МЖтКнинг 183-моддасида назарда тутилган ҳуқуқбузарликни содир этган деб топилди ва унга нисбатан 10 сутка маъмурий қамоқ жазоси тайинланди.
