Бош прокуратура матбуот котиби Ҳаёт Шамсутдиновнинг “Darrakchi.uz”га маълум қилишича, воқеа 18 февраль куни яшаш хонадонида содир бўлган. 16 ёшли Ў.Ў. Қўқон шаҳар 1-сон ИИБ профилактика инспектори билан ўзаро жанжаллашиб, унга ошхона пичоғи билан тан жароҳати етказган. Оқибатда инспектор оғир аҳволда шифохонага ётқизилган.
Мазкур ҳолат юзасидан вояга етмаган шахсга нисбатан Жиноят кодексининг 104-моддаси 2-қисми “б” банди (ўз хизмат ёки фуқаролик бурчини бажариши муносабати билан шахсга қасддан оғир тан жароҳати етказиш) билан жиноят иши қўзғатилиб, Жиноят-процессуал кодексининг 221-моддаси тартибида ушланган. Ушбу модда билан айбдор деб топилган шахсларга 5 йилдан 8 йилгача озодликдан маҳрум қилиш жазоси тайинланиши мумкин.
Ҳозирда жиноят иши юзасидан Қўқон шаҳар прокуратураси томонидан дастлабки тергов ҳаракатлари олиб борилмоқда.
