Сурхондарё вилоятида шифохонада шифокор ва беморга ҳужум қилган Alfa жиноий гуруҳи аъзоларига нисбатан суд ҳукми эълон қилинди. Бу ҳақда Жиноят ишлари бўйича Денов туман суди ҳукмида маълум қилинган.
Тергов материалларига кўра, гуруҳ аъзолари йўл-транспорт ҳодисасида жабрланган танишини кўриш учун шифохонага келиб, у ерда жанжал кўтарган. Оқибатда улар шифокор ҳамда иккинчи автомобил ҳайдовчисини дўппослаган.
Мазкур ҳолат юзасидан Жиноят кодексининг 277-моддаси 3-қисми “г” банди билан жиноят иши қўзғатилган.
Судда аниқланишича, 28 ёшли С.Х. ва унинг шериклари осон даромад топиш мақсадида жиноий гуруҳ ташкил этиб, безорилик, товламачилик ва бошқа ноқонуний ҳаракатлар билан шуғулланган.
Хусусан, ҳолатлардан бирида улар фуқаролардан бирини мажбуран автомобилга ўтқазиб, ундан 2 минг 500 АҚШ доллари талаб қилган. Шунингдек, жабрланувчининг Labo русумли автомобили калитлари ва ҳужжатларини ҳам тортиб олган.
Суд ҳукмига кўра, айбланувчилардан икки нафари 3 йил муддатга озодликдан маҳрум қилинган. Яна бир судланувчига 5 йил, қолган икки нафарига эса 5 йил 1 ойдан қамоқ жазоси тайинланган.
