Ўзбекистонда биринчи марта криптовалюта майнинги фаолиятини амалга ошириш учун расмий рухсатнома тақдим этилди. Бу ҳақда Spot Истиқболли лойиҳалар миллий агентлигининг майнинг фаолияти учун берилган рухсатномалар электрон реестрига таяниб хабар берди.
Маълум қилинишича, 19 январ куни агентлик директорининг буйруғи билан NexaGrid компаниясига майнинг фаолияти билан шуғулланиш ҳуқуқи берилган. Компаниянинг фаолият манзили сифатида Бухоро вилояти Ромитан тумани кўрсатилган. Ушбу ҳужжат мамлакатда мазкур йўналиш бўйича берилган илк рухсатнома ҳисобланади.
NexaGrid юридик шахс сифатида 2025 йил апрель ойида Тошкент шаҳрида рўйхатдан ўтган бўлиб, унинг устав фонди 600 миллион сўмни ташкил қилади. Компания компьютер ускуналарини бошқариш фаолияти билан шуғулланади. Таъсисчилари — Тўймурод Султонов (63 фоиз) ва Маҳмуджон Рўзимуродов (37 фоиз). Шунингдек, Султонов компания раҳбари ҳисобланади.
У ўзининг LinkedInдаги саҳифасида NexaGrid майнинг учун рухсатномани қонуний ва шаффоф тарзда олганини таъкидлаган. Қайд этилишича, лойиҳа қисқа муддатли фойда эмас, балки Марказий Осиёда келажак инфратузилмасини шакллантириш мақсадида йўлга қўйилган.
Эслатиб ўтамиз, 2023 йил кузида Истиқболли лойиҳалар миллий агентлиги майнинг фаолиятини лицензиялаш тартибини тасдиқлаган. Унга кўра, майнинг фақат юридик шахслар томонидан ва асосан қуёш фотоэлектр станциялари орқали ишлаб чиқарилган электр энергияси асосида амалга оширилади. Ягона электр тармоғига уланишга рухсат берилган, бироқ бунда икки баробар тариф қўлланади.
Рухсатнома 5 йил муддатга бепул берилади ва аризалар 15 кун ичида кўриб чиқилади. Шунингдек, яширин ва рухсатномасиз майнинг билан шуғулланиш тақиқланади. Олинган крипто-активлар эса фақат лицензияга эга крипто-биржалар орқали сотилиши мумкин.
Ҳозирда Ўзбекистонда 21 та крипто-хизмат провайдери фаолият юритмоқда. 2022 йилдан буён улар томонидан 107 миллиард сўмдан ортиқ бож ва йиғимлар тўланган.
