Фарғона вилоятида ўтказилган тезкор тадбирлар давомида қарийб 21 минг дона кучли таъсир қилувчи дори воситалари мусодара қилинди. Бу ҳақда ҳуқуқни муҳофаза қилувчи органлар маълум қилди.
Қўқон шаҳрида ўтказилган тадбирда 1983 йилда туғилган фуқаро бошқарувидаги “Спарк” автомашинаси тўхтатилиб, унинг салонидан 9960 дона “Зардекс” дори воситаси ашёвий далил сифатида олинди.
Шунингдек, Наманган вилояти Поп туманидаги ЙПХ масканида Қувасойлик фуқаро бошқарувидаги “Кобальт” автомашинаси текширилганда, эшикларининг ички қисмига яширилган 8000 дона “Зардекс” ҳамда 309 грамм “гашиш” гиёҳвандлик воситаси аниқланди.
Бағдод туманида эса “Нексия” автомашинасидан 1691 дона “Регапен” дори воситаси олинган. Яна бир ҳолатда Фарғона туманида икки нафар фуқаро 1274 дона “Регапен” дорисини 56 миллион сўмга сотган вақтида қўлга олинган.
Ҳолатлар юзасидан Жиноят кодексининг 251¹, 246 ва 273-моддалари билан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланилган. Тергов ҳаракатлари давом этмоқда.
