— Бош оғриқлари, томоқ-бурун билан боғлиқ безовталиклар барчани бирдек ташвишга солади. Албатта, ҳар қандай вазиятда ҳам шифокорга мурожаат қилган маъқул. Унга қадар эса уй шароитида баъзи халқона усулларни синаб кўрса ҳам бўлади.
Асалари елимидан...
Оёқнинг товон соҳасидаги қавариқлар дағаллашиб, ярага айланганида қуйидаги усулни синаб кўринг: мойчечак ёки исириқ қайнатмасида оёқни ванна қилинг. Сўнг асалари елимини бармоқларингиз орасига олиб, юмшатинг-да, яра устидан суртинг. Пайпоқ кийиб эрталабгача қолдиринг. Муолажани ҳафтасига 2-3 марта такрорлаш мумкин.
Ангина бошланаётганида...
Ютинганингизда томоқда оғриқ сезилаяптими, сизга киви меваси ёрдам бериши мумкин. Битта кивини арчиб, тўғраб олинг. Сўнг аста-секинлик билан истеъмол қилинг. Мева шарбати оғриқ нуқтасини таъсирлантириб, безовталикни енгиллаштиради.
Бурун қонаганида...
Болалар ва катталардаги бурун қонашини шакар билан тўхтатиш мумкин. Бунинг учун бурни қонаётган одамга (болаларга 1 чой қошиқ, катталарга 1 ош қошиқ) шакар едиринг. Сўнгра суюқлик ичилмаслик лозим. Кейин бурунни чайқаб, пешанасига нам сочиқ қўйинг.
Овоз дағаллашганида...
Қирғичдан ўтказилган битта шолғомни 1 стакан қайнаган сувда дамланг-да, устини сочиқ билан ўраб, икки соатга қолдиринг. Сўнг докадан ўтказиб, кунига 5 маҳал оз-оздан қабул қиласиз. Муолажа давомийлиги 7 кун.
Остеартроз кузатилганида...
Асосий муолажа билан биргаликда бир кунда 1-2 маҳал овқатдан олдин 1 ош қошиқдан қоқи ўт (момоқаймоқ) истеъмол қилинади. Шунингдек, қоқи ўтни сабзавотли салатга қўшиб, ейиш ҳам мумкин.
Қувватсизликда...
Кунора эрталаб, оч қоринга битта қирғичдан ўтказилган сабзини сметана ёки ўсимлик ёғига аралаштириб, истеъмол қилишга одатлансангиз, авитаминоз, камқонлик, қабзият кабилар безовта қилмайди. Қолаверса, дармонсизликка даво бўлиб, қувватни тиклайди. Буниси маъқул бўлмаса, кун давомида асал қўшилган сабзи (1 стакан) шарбатини ичишингиз мумкин.
Н.Илёсова тайёрлади
