Ер муносабатлари соҳасида қонунбузилишларга қарши курашиш доирасида Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан Қашқадарё вилоятида тезкор тадбирлар ўтказилди.
Маълум бўлишича, Қарши туманида Кадастр агентлиги бўлими етакчи инспектори мансабдор танишлари орқали ноқонуний эгаллаб олинган 12 сотих ер майдони бўйича қўлланилган 82 млн сўм жаримани бекор қилиб бериш ҳамда кадастр ҳужжатларини расмийлаштириш эвазига 2 минг АҚШ доллари олган вақтида ашёвий далиллар билан ушланган.
Шунингдек, Шаҳрисабз туманида ҳам шунга ўхшаш ҳолат аниқланган. Муқаддам фирибгарлик жинояти учун судланган 59 ёшли шахс ва Давлат кадастрлари палатаси туман филиали ходими ўзаро тил бириктириб, маҳаллий деҳқон хўжалигига тегишли 9 сотих ер майдонини мансабдор танишлари орқали хусусий корхона раҳбари номига расмийлаштириб бериш эвазига 7 минг АҚШ доллари талаб қилган.
Улар олдиндан 4 минг АҚШ долларини олган вақтда қўлга олинган.
Ҳар икки ҳолат юзасидан жиноят ишлари қўзғатилиб, ҳозирда тергов ҳаракатлари олиб борилмоқда.
