Ўзбекистонда янги қурилаётган уй-жойларда энергия тежамкор материаллардан кенг фойдаланиш бўйича янги талаблар жорий этилади. Бу ҳақда Президент Шавкат Мирзиёев раислигидаги йиғилишда маълум қилинди.
Давлат раҳбари аҳоли ўртасида энергия тежамкор қурилиш материалларининг афзалликлари ҳақида хабардорлик ҳали ҳам етарли эмаслигини таъкидлади.
Қайд этилишича, агар уйларнинг фасад ва том қисми иссиқлик сақловчи материаллар билан қопланиб, энергия тежамкор ойналар ўрнатилса, энергия сарфи 30 фоизгача қисқариши мумкин.
Йиғилишда Қашқадарё вилоятининг Қамаши туманида Франция ва Буюк Британия компаниялари иштирокида қурилаётган 4 минг хонадонли “Янги Ўзбекистон” массиви мисол сифатида келтирилди. Лойиҳада тўлиқ энергия тежамкор маҳаллий маҳсулотлар қўлланилаётгани, бу эса қурилиш таннархини камида 20 фоизга арзонлаштириши ва уйларни иситиш-совитиш харажатларини 30 фоизга камайтириши қайд этилди.
Президент вилоят, туман ва шаҳар ҳокимларига Қамаши тажрибасини ўрганишни топширди. Шунингдек, жорий йил “Янги Ўзбекистон” қиёфаси олиб кириладиган 33 та туман ва шаҳардаги кўп қаватли уйлар қурилиши мазкур ёндашув асосида амалга оширилиши белгиланди.
