АҚШнинг собиқ президенти Барак Обама рафиқаси Мишель, Virgin Group компаниясининг эгаси Ричард Брэнсон билан бирга Британиянинг Виргин оролида дам олмоқда, деб хабар берди “Lenta.ru” нашри.
Бу ҳақда TMZ портали хабар бериб, Оқ уй собиқ раҳбарининг Карибда дам олаётгани акс этган бир қанча суратларни намойиш қилди.
Нашрнинг маълумот беришича, Обамалар бундан бир ҳафта илгари британиялик миллиардерга тегишли бўлган оролга дам олиш учун келган. Суратлардан Барак Обаманинг янги президент Дональд Трампга қарши норозилик намойишлари ўтказилаётган Америкага ҳали-бери қайтиш нияти йўқлиги кўриниб турибди.
31 январь куни Барак Обама фуқароларнинг янги президентига қарши ўтказаётган норозилик намойишларини қўллаб-қувватлаб, бу уларнинг конституциявий ҳуқуқлари эканлигини маълум қилди. Собиқ президент Трампнинг муҳожирларга қарши чиқарган қарори Америка қадриятларига хавф туғдиришини таъкидлади.
Дональд Трамп 27 январь куни грин карта ютган Эрон, Ироқ, Яман, Ливия, Сурия, Сомали ва Судан фуқароларининг АҚШга киришини тақиқлаш ҳақида фармон чиқарди. Бундан ташқари, суриялик қочоқларни 120 кун давомида АҚШга қабул қилиш ҳам тўхтатилди. Ҳужжатда суриялик муҳожирлар Қўшма Штатлар манфаатига зиён етказиши мумкинлиги кўрсатиб ўтилган.
