Уй юмушларию рўзғор ташвишлари билан бўлиб, тобора асабий ва жиззаки аёлга айланиб бораяпсизми? «Ҳа» дейишга оғиз жуфтлаётган бўлсангиз, тўхтанг! Қани ўзингизни қўлга олингчи! Қаддингизни тик тутдингизми? Баракалла! Ана энди ижобий ҳиссиётларни пайдо қилишнинг бир қанча усуллари билан танишинг.
Шоколад ва қаҳва! Куз тонгини айнан мана шу жуфтлик билан бошланг. Қайноққина қаҳва ва тилда эрийдиган ширинлик, албатта, кайфиятингизнинг кўтарилишига ёрдам беради. Табассум билан бошланган кун эса ҳайрли кечади.
Қулоқчинларингиз борми? Мусиқа кайфиятга қараб танланиши рост. Кузда кўпинча сокин тароналарни тинглаймиз. Аммо бу билан айрилиқ ёки шу каби кайфият бағишловчи тароналарни тушунманг. Муҳаббат тўғрисидаги қўшиқларни тингланг! Қулоқчинларни тақиб олиб, уй ишларини бажариш эса ғайратингизни оширади.
Учрашувга чиқинг! «Эрим ўқиб қолса борми», дея юрагингиз така-пука бўлаяптими? Ҳавотирланманг, шу эргинангиз билан учрашинг деяпмиз-да. Ҳафта давомида атиги бир соат вақт топинг-да, бирга тушлик қилинг ёки шунчаки сайрга чиқинг. Нафақат кайфиятингиз кўтарилади, балки муносабатларингизда ҳам ижобий ўзгаришлар кузатилади. Мана мени айтди дерсиз.
Фарзандингиз билан шуғулланинг! Биз қизим билан бирга қувлашмачоқ ўйнаймиз, ўйинчоқ қошиқчасида мени овқатлантирадиган одати ҳам бор. Тағин кичик шеърларни ёд олаяпмиз. Қизалоғимнинг кулгуси, шодон қийқириғидан шунақанги қувват оламан, асти сўраманг!
Қўшиқ куйланг! Бу ўзимда синалган тавсиялардан бири. Тушкунликка берилмаслик учун ҳиргойи қиламан. Уйда мусиқани ёқиб, баралла ашула айтишим ҳам мумкин. Кўпинча бу ишни фарзандларим билан бирга бажарамиз.
Интерьерни янгиланг! Бир хилликдан зериккан бўлсангиз, бу айни муддао. Жиҳозларнинг одатдаги ўрнини алмаштириб, тамоман янгича кўринишни пайдо қилинг.
Рухшона, хонанда
