Ҳиндистонлик эркак рафиқасининг ўлимидан сўнг болға билан тоғни тешиб, йўл очди

Бу одамнинг муҳаббати, олижаноблиги, яхшилиги ҳақиқатан ҳам таҳсинга лойиқ, деб хабар беради Interesno.cc нашри.

У ўзининг ҳаракатлари билан барчага ўрнак бўлишга арзийди.

Дашрат Маньи бир умр Ҳиндистоннинг кичкина қишлоғида умргузаронлик қилди. У рафиқаси билан муҳтожликда кун кечирса-да, муҳаббат ўзларини бахтли ҳис қилишларига ёрдам берди. Аммо уларнинг меҳр-муҳаббатларига кўз тегди. Дашратнинг рафиқаси бедаво дардга чалиниб, шифокор ёрдами керак бўлди. Улар энг яқин шаҳардаги касалхонага боришлари учун ҳам 80 километр пиёда йўл босишлари лозим эди. Эр-хотин кўзлаган манзилларига етиш учун қўлларидан келгунча, тезроқ ҳаракат қилишди. Аммо тоғ уларнинг йўлини тўсиб, сафарни оғирлаштирди. Ўзи шусиз ҳам касаллик туфайли заифлашиб қолган аёл, йўл азобини кўтара олмай вафот этди.

Энг яқин инсонини йўқотиш эркак учун катта фожиа бўлди. У энди қандай яшашни билмай, ҳаётининг мазмуни йўқолди. Шундай айрилиқ азобини чекиб юрган кунлари унда ажойиб фикр туғилди. Эркак режалаштирган фикрини амалга ошириш учун бир ҳафта давомида керакли асбоб-ускуналарни йиғди.

Дашрат астрономик аниқлик билан уларнинг йўлига ғов бўлиб, рафиқасининг ўлимига сабабчи бўлган тоғни биттама-битта тошларга ажрата бошлади. Унинг бошига тушган фожиа ҳамқишлоқларининг ҳам бошига тушмаслиги, бу бахтсизлик қайта такрорланмаслиги учун тоғнинг ўртасини тешиб, йўл ўтказмоқчи бўлди.

Қалбини айрилиқ азоби кемираётган Дашрат тиним билмай меҳнат қилиб, аламини ишдан олди. У қишлоқдошларининг бахтли келажагини ўйлаб, бу ишни амалга оширишдан тўхтамади. Эркак ҳар куни ғира-шира тонгда чиқиб кетиб, уйига ярим кечаси зўрға судралиб, қайтарди.

Бу иш 2007 йил, то у вафот этгунга қадар давом этиб, 22 йил мобайнида ҳаёти мазмунига, кундалик одатига айланди. Ҳамқишлоқлари унинг болға кўтарганча, шундай улкан тоғ билан курашаётганини кўриб, ақлдан озганга, телбага чиқариб қўйишди.