Қўшма Қиролликнинг мустақил партиясида террорчилар учун ўлим жазосини қўллашни яна тиклаш фикри билдирилди, деб хабар берди Russian.rt.com нашри.
Бу ҳақда партия аъзоси Женис Эткинсон маълум қилди.
“Биз айни пайтда уруш ҳолатида турибмиз, аммо ҳарбийларимиз жиноят ва террорнинг устидан ғалаба қозона олмаяпти. Мен сиёсатчиман, мазкур муаммонинг ечимини топиш учун фақатгина қарорлар қабул қила оламан. Вазиятдан келиб чиқиб, террорчилик жиноятлари учун ўлим жазоси қўлланишини эълон қилишимиз лозим. Касални даволагандан кўра, унинг олдини олган маъқул”, деди у.
Женис Эткинсоннинг сўзларига қараганда, фракция ўлим жазосини қайта қўллаш учун референдум ўтказишни кўзда тутган.
Эслатиб ўтамиз, 22 май куни, америкалик хонанда Ариана Гранденинг Манчестерда бераётган концертида рўй берган портлаш оқибатида 22 киши ҳалок бўлди, 120 нафарга яқин одам яраланди. Мазкур теракт жавобгарлигини “Ислом давлати” террорчилик гуруҳи ўз бўйнига олди.
