Американинг Висконсин штатида яшовчи Мелисса Смит автомашинасини ўғри олиб қочаётганини кўргач, капотнинг устига ўзини отди, деб хабар берди Tengrinews.kz нашри.
Мазкур воқеани автоёқилғи қуйиш шаҳобчасидаги камера видеога олди. Унда қиз машинадан тушиб, ёқилғи қуймоқчи бўлганда, ўғри яширинча келиб рулга ўтиргани, уни ҳайдаб қочмоқчи бўлгани ва қиз ўғридан машинасини тортиб олмоқчи бўлиб, капот устига сакрагани акс этган. Ўғри қизни капотдан тушириш учун автомашинанинг ойна тозалагичини ишга солди. Бироқ буни фойдаси йўқлигини кўриб, ўзи автомобилдан сакраб тушиб, бошқа машинада қочиб кетишга муваффақ бўлди.
“Мен бу ҳаракатни ўзим сезмаган ҳолда, беихтиёр амалга оширдим. Қанчалик хавф-хатар остида қолганимни энди тушуняпман, бу ақлга сиғмайдиган иш”, деди Смит The Independent нашрига берган интервьюсида.
