Сочи шаҳрининг серқатнов йўлларидан бирида кетаётган автомашина юкхонасидан икки нафар бола тушиб қолди, деб хабар берди Tengrinews.kz нашри.
Воқеа автомобиль ҳаракатланаётган пайтда юз берди. Нашрнинг хабар беришича, автомобилни 39 ёшли аёл бошқарган, ҳозирда унга нисбатан маъмурий баённома тузилди. Нима учун у болаларни юкхонага жойлаштиргани ҳозирча номаълум. Видеорегистратор орқали аёл автомашинани шаҳар марказидаги серқатнов кўчалардан бирида бошқариб кетаётганлигини, қайсидир сонияда машина юкхонаси очилиб, унинг ичидан аввал бир нафар, кейин яна бир бола тушиб қолганини кўриш мумкин. Шундан кейин орқадан келаётган машина тўхтаб, унинг ҳайдовчиси болаларни йиқилган жойларидан кўтариб олди. Уларнинг тушиб қолганини аёл дарров сезмади. Орадан маълум вақт ўтгач, воқеа жойига қайтиб келди. Маълумотларга кўра, 3 ёшли қизча йиқилиш оқибатида тан жароҳати олиб, касалхонага ётқизилган, иккинчи болага эса ҳеч нарса қилмаган.
