Буюк Британиянинг шотландияликлар яшовчи Скоттиш-Бордес вилоятида яшовчи оила фарзандларига энага қидираётганлиги ҳақида эълон берди, деб ёзди Vesti.ru нашри.
Шу билан бирга эълонда мазкур оила яшовчи уйда арвоҳлар борлиги ҳақида очиқ ёзилган.
Эълон Буюк Британиянинг Childcare.co.uk номли энага қидириш билан шуғулланувчи йирик сайтига жойлаштирилган. Оила 5 ва 7 ёшли болага энагалик қилиш учун йилига 50 минг фунт стерлинг (60 минг АҚШ долларидан ортиқ) пул тўлаши, энага улар билан бирга яшаши, уйлари гўзал манзарага эга бўлиб, қадимий бинода жойлашгани ҳақида маълумот берган. Шу билан бирга улар мазкур уйда ўн йилдан бери яшаётганликлари, уни сотиб олаётганда уйнинг олдинги эгалари арвоҳлар борлиги ҳақида огоҳлантирганини яширмаган. Ўтган йиллар мобайнида уларнинг оиласида 5 нафар энага ишлаган, аммо уйдаги ғалати товушлар, ойналарнинг ўз-ўзидан синиши, мебелларнинг жойидан силжиши оқибатида ишдан кетишга мажбур бўлган. Уй эгаларининг ўзи эса бирор ғайритабиий нарсани сезмаган.
Childcare.co.uk сайтининг ижроия директори Ричард Конвэй эълоннинг ҳақиқийлигини, ёлғон эмаслигини тасдиқлаб, мазкур вазифани бажариш учун энага топилишига ишонч билдирди. Унинг сўзларига қараганда, мазкур уйдаги ғайритабиий воқеа-ҳодисалардан ҳеч ким жабрланмаган.
