Колумбиянинг шимоли-шарқий қисмида фаолият юритувчи Колумбия чап радикал ташкилотининг миллий озодлик армияси аъзолари нидерландиялик икки журналистни ўғирлади, деб ёзди Ria.ru нашри.
Телевидение журналисти Дерк Йоханнес Болт ва оператор Еуджинио Эрнест Марилар Венесуэла чегарасида жойлашган Шимолий Сантандеранинг Эл-Тарра шаҳридаги иш жараёнида қўлга олинган. Колумбиялик ҳарбийлар йўқолган журналистларни қидириб топиш операциясини бошлади.
Нашрнинг хабар беришича, Колумбия чап радикал ташкилотининг миллий озодлик армияси икки минг кишидан ташкил топган. У Колумбиядаги Колумбия инқилобий қуролли кучларидан кейин иккинчи ўринда турувчи қуролланган ташкилот ҳисобланади.
