Ўзбекистон халқ артисти, “Ёшлар” телерадиоканалининг директори Озодбек Назарбеков катта телелойиҳага қўл урди.
Мазкур кўрсатув “Ёшлар қабулхонаси” деб номланиб, унинг 20 июлда эфир юзини кўрадиган илк сони бугунги кунда ОТМларга кириш учун ҳужжат топширган абитуриентларнинг муаммоларига бағишланади. Бу ҳақда шоир Муҳаммад Исмоил ўзининг Facebook`даги саҳифасида маълум қилди.
Шунингдек, Озодбек Назарбеков билан боғланган шоирнинг ёзишича, “Ёшлар” телеканали томонидан Ўзбекистоннинг Биринчи Президенти Ислом Каримовнинг болалиги ва ҳаёт йўли ҳақида фильм ҳам суратга олинмоқда. Бундан ташқари, мана шундай туркум фильмлар таниқли давлат арбоби Шароф Рашидовга ҳам бағишланади.
Озодбек Назарбеков “Ёшлар” телеканалида “Ким миллионер бўлишни хоҳлайди?”, “Голос” каби лойиҳаларнинг ўзбекча талқини ҳам эфирга узатилиши режалаштирилганини маълум қилган.
