Россиянинг Биринчи каналидаги машҳур телебошловчиларидан яна бири ишсиз қолди, деб хабар берди Tengrinews.kz нашри.
Гап “Пока все дома” кўрсатувининг телебошловчиси Темур Кизяков ҳақида кетмоқда. Ҳозирда мазкур кўрсатувнинг суратга олиш ишлари тўхтатилган. Бунга телебошловчининг декабрь ойида жанжал марказида қолганлиги сабаб бўлди. Темур Кизяков кўрсатувнинг хайрия қисмини қўшимча равишда молиялаштирганликда айбланган эди. Аниқланишича, етим болалар акс этган видеолар катта пул турган. Уларнинг ҳар бирига 100 минг рублдан сарфланиб, кўрсатув халқ таълими вазирлигидан грант тарзда ўн миллион рубль олган.
Темур Кизяков айни пайтда бошқа хайрия ташкилотлари билан ҳам судлашаётгани маълум бўлди. Биринчи канал раҳбарияти ва Темур Кизяков мазкур ҳолатга изоҳ бермади. “Пока все дома” кўрсатуви 1992 йилдан бери ҳар якшанба куни эфирга узатилиб келган. Бу кўрсатув Биринчи каналнинг ташриф қоғози эди. Темур Кизяков эса кўрсатувнинг доимий бошловчиси бўлиб келган.
Илгари Биринчи канални машҳур телебошловчилар Андрей Малахов ва Александр Олешколар ҳам тарк этганлиги ҳақида хабар берган эдик.
