Нигерия президенти Муҳаммад Бухорий уйида ўтириб, ишлайдиган бўлди, деб хабар берди Tengrinews.kz нашри.
Нашрнинг хабар беришича, Бухорий уч ой давомида чет элда даволаниб, Нигерияга энди қайтган. Унинг йўқлигида кабинетидаги буюмларни сичқонлар кемириб ташлаган.
“Уч ой давомида президент кабинети бўш турганлиги боис кемирувчилар мебель ва кондиционерларга жиддий зарар етказган”, деб маълумот берди Нигерия президентининг вакили Гарба Шеху. Унинг сўзларига қараганда, мамлакат президентининг уйда ишлаши иш фаолиятига салбий таъсир кўрсатади, шунинг учун унинг иш кабинети тез кунларда капитал таъмирдан чиқарилади.
Май ойининг бошида Нигериянинг 74 ёшли президенти Муҳаммад Бухорий мамлакатни вақтинчалик бошқаришни вице-президент Йеми Осинбажога топшириб, ўзи даволаниш учун Буюк Британияга жўнаб кетган эди. У бундан бир неча кун илгари Нигерияга қайтган.
