Президент Шавкат Мирзиёев Хоразм вилоятига амалга оширган ташрифи давомида Урганч шаҳридаги Ёшлар марказида яратилган шароитлар билан яқиндан танишди. Бу ҳақда Ўзбекистон Ёшлар Иттифоқининг Facebook cаҳифасида хабар қилинди.
«Биз бу каби замонавий иншоотларни кўплаб қуришимиз мумкин. Лекин унинг ичида қандай таълим-тарбия олиш, ҳунар ўрганиш сиз ёшларнинг интилиш ва ташаббусларингизга боғлиқ. Хоразмлик ёшлар бу борада бошқаларга ўрнак бўлиши керак», деди давлат раҳбари.
Шунингдек, Президент турли сабабларга кўра тўғри йўлдан адашиб қолган ёшларни соғлом ҳаётга қайтаришда уларнинг тенгдошлари ёрдам бериши кераклигини қайд этди. Шундан сўнг, Шавкат Мирзиёев вилоятнинг бир гуруҳ фаол ёшлари билан учрашиб, улар билан суҳбатлашди. Улар орасидан 17 ёшли спортчи Ширинойга давлат раҳбари Спарк русумли автомашинани совға қилди.
Широной оддий оила фарзанди. Отаси қурувчи, онаси эса уй бекаси. Оиладаги эътибор туфайли 10 йилдан буён спортнинг карате тури билан шуғулланиб келади. 2012 йилда Ўзбекистонда ўтказилган жаҳон кубогида 2та олтин медални қўлга киритган. 2013 йилда эса Япониянинг Токио шаҳрида ўтказилган жаҳон чемпионатида ҳам мутлақ ғолиб бўлган. У бугунги кунда 3 карра жаҳон чемпиони деган юксак ном эгаси.
Шириной Раҳимова: "Олтин медалларга эга бўлганимда ҳам бунчалик қувончга, ҳаяжонга тўлиб-тошмаган эдим» Юртбошимиз билан учрашувда шунақанги ҳаяжонландимки, «Ҳаяжонни тўхтатиб машина ҳайдашни ўргансангиз, сизга машина совға қиламан», деганларида гулдурос қарсаклар чалинди. Тинч мамлакатнинг бахтиёр фарзанди эканлигимдан қалбим қувончга тўлди. Жаҳон чемпионатларида олтин медальни қўлга киритганим олдида ҳаяжон билан Президентимиз билан бўлган учрашувдаги ҳаяжонимни асло тенглаштириб бўлмайди. Шунча шарт-шароитлардан кейин биз, ёшлар астойдил меҳнат қилмасак, ўқиб-ўрганмасак, Ўзбекистон фарзанди деган номга муносиб бўлолмаймиз". |
