Амалдаги тартибларга мувофиқ, республика ҳудудига қалбакилаштирилган маҳсулотлар ва товарларни ноқонуний олиб киришга чек қўйиш мақсадида божхона чегараси орқали товарларни олиб кираётган юк ташувчилар чегарани кесиб ўтган жойидаги божхона органларига ўтказилаётган товарлар тўғрисидаги маълумотни, шу жумладан уларнинг номи, миқдори, вазни ва юклар қиймати, тегишли товар кодлари ҳақидаги маълумотни тақдим этишлари шарт.
Яқинда Тошкент шаҳар божхона бошқармаси Контрабандага қарши курашиш бўлими ходимлари томонидан Хитой давлатидан юк қабул қилувчи, якка тартибдаги тадбиркор И.З номига келган контейнерлар унинг ишончли вакили иштирокида очилиб, кўздан кечирилганда мазкур контейнерга йўл-юк ҳужжатларида қайд этилган умумий қиймати 12 720 АҚШ долларини ташкил этувчи, вазни 53 тоннадан ортиқ МДФ ёғоч толали плитаси ва темир сим маҳсулотлари ўрнига юк кузатув ҳужжатларида қайд этилмаган вазни 52 тоннадан зиёд профнастил учун мўлжалланган саморез маҳсулотлари юкланганлиги маълум бўлди.
Далилий ашё сифатида вақтинча олиб қўйилган товар моддий бойликларнинг умумий қиймати дастлабки ҳисоб-китобларга кўра 1 миллиард 93 миллион сўмдан ортиқни ташкил этди.
Агарда тақдим этилган ҳужжатларга асосан маҳсулотлар расмийлаштирилганда 4 млн. сўм божхона тўловлари ундирилиши мумкин эди. Аммо божхона кўриги натижасида аниқланган маҳсулотлар расмийлаштирилганда эса 1 млрд. 31 млн. сўм божхона тўловлари ундирилиши аниқланди.
Бундан кўриниб турибдики, қонунбузар ўзи олиб кираётган маҳсулотларини ҳужжатларда бошқа ном билан кўрсатиш йўли билан 1 млрд. сўмдан ортиқ маблағни давлат бюджетига тўлашдан қочишга уринганлиги фош бўлди.
Шунга ўхшаш яна бир ҳолатда божхона ходимлари Хитой давлатидан “KINGS” МЧЖномига келган контейнерларни ушбу масъулияти чекланган жамият вакилиА.А иштирокида божхона кўригидан ўтказишганда йўл-кузатув ҳужжатларидан қайд этилган умумий вазни 46 тоннадан зиёдпол учун мўлжалланган ламинатцияланган плита маҳсулотлари ўрнига умумий қиймати 2 миллиард сўмдан ортиқни ташкил этувчи кийим-кечак ва бошқа маҳсулотлар ортилгани аниқланди.
“Чуқурсой техник идора” темир йўл чегара божхона пости ходимлари Контрабандага қарши курашиш бўлими ходимлари билан ҳамкорликда Хитой давлатидан юк қабул қилувчи А.А номига келган контейнердаги маҳсулотлар унинг иштирокида божхона кўригидан ўтказилганида, юк кузатув ҳужжатларида товарлар “Мебельная фурнитура” деб кўрсатилган бўлсада, лекин божхона кўригида юк кузатув хужжатларида умуман кўрсатилмаган ва ҳужжатларда курсатилгандан ортиқ умумий қиймати 3,5 млрд сўмдан зиёдтурли хил автомобиль эхтиёт қисмлари, мебель учун маҳсулотлар ҳар хил турдаги дастгоҳлар, кийим-кечаклар, спорт товарлари, 2232 дона ҳар хил турдаги дорилар, кир ювиш кукунлари ва бошқа маҳсулотлар борлиги аниқланиб далилий ашё сифатида олиб қўйилди.
Ҳозирда юқоридаги ҳолатлар юзасидан божхона текширувлари ва суриштирув ишлари олиб борилмоқда.
