“Азиз ва муқаддассан аёл” - режиссёр Саъдулла Абдуллаев ва “Замин” студияси бошчилигида 16 йилдан бери ташкил этиладиган ушбу концертни ҳар йили аёллар интизорлик билан кутишади.
Ушбу концерт бу йил ҳам 4-6 март кунлари пойтахтимизнинг “Истиқлол” санъат саройида бўлиб ўтди. Анъанага содиқ ҳолда бу йил ҳам концертга оиламиздаги аёллар билан тушдик. Бу сафарги концерт мазмун моҳияти ҳақида фикр билдиришдан йироқман. Мени эътиборимни бошқа бир масала тортди.
Маълумки, юртимизда концерт дастурлари одамларнинг ишдан чиқиш вақтини инобатга олган ҳолда соат 19:00 да бошланади. Ҳар йили ушбу саройда бўлиб ўтадиган концерт дастурларига тушиб тураман, бироқ бу йили шунча пайтдан бери кўрмаган ҳолатимга дуч келганим ва журналист эканлигим учун буни ёзишим керак деган хулосага келдим.
Ишдан чиқиб, соат 18:45 да концерт залига етиб бордик. Аввалига сарой кўчасидаги зиналарнинг бутунлай тўсиб қўйилганлиги бир-икки метргина жой эса очиқ қолдирилгани одамларни асабини таранглаштирган ва тирбандликлар ҳосил қилган бўлса, зинадан тепага чиққач иккинчи муаммога дуч келинди. Концерт бошланишига 10 дақиқа қолган кўчада эса концертга ташриф буюрган тумонат одам йиғилиб турибди, уларнинг аксарияти аёллар ва болалар.
Аслида чиптада 10 ёшгача бўлган болалар киритилмайди дейилганига қарамай, аёлларимизнинг баъзилари ҳатто чақалоқлар билан концертга ташриф буюришган. Майли, гап бунда эмас, буни уларнинг оилавий шароитлари билан боғлиқ деб ўйлашимиз ва “ўзбекчиликка” йўйишимиз мумкин, бироқ уларнинг узун навбат ва ур-йиқит орасида турганликларидан қўрқиб, йиғлаган болалар ҳам бўлди.
Одамлардан ташкил топган жуда узун навбат ўз жойида 15 дақиқа қимирламай турди, аҳийри, концерт бошланишига 5 дақиқа қолганида, одамлар эшик тагида ҳавфсизликни таъминлаётган ҳуқуқ-тартибот органларига киритишни талаб қилиб, бир-бирларини итара кетишди. Концерт ташкилотчиларининг концертга жуда секинлик билан киритаётгани етмагандай, энди соат 19:00 бўлганда эшиклар бир неча дақиқага ёпиб қўйилди.
(соат 19:00, эшиклар ёпиқ, чиптаси бор аёллар ичкарига кира олмаяпти)
Хуллас, концерт залига кирганимизда соат 19:15 эди, бизнинг ортимиздан кирмаган ҳали анчагина одам бор эди. Залда эса концерт бошланиб бўлганди.
Концертнинг сўнгги куни юзага келган ушбу ҳолатга ойдинлик киритиш мақсадида сарой ҳавфсизлигини таъминлаётган ҳуқуқ-тартибот органи вакилига мурожаат қилганимизда, у концертга одамлар жуда кеч келганини важ қилиб кўрсатди.
Бироқ концертларга томошабинларнинг кеч келиши азалдан бўлганлигини инобатга олсак, кечаги концертда ҳам бу сабаб бўла олмасди.
Ҳуқуқ посбонининг яна бир изоҳига кўра, бир кун аввал умуман чиптасиз ва эски чипталар билан кириш ҳолатлари кузатилган, бунинг оқибатида эса концерт зали ичида тушунмовчиликлар юзага келган.
Ушбу ҳолатга санъат саройи маъмуриятининг фикри билан қизиқдик. Исмини ошкор қилмаслигимизни сўраган сарой вакилининг айтишича, 6 март куни юзага келган вазиятдан унинг ҳам хабари бор. Бироқ у ҳам буни одамларнинг концертга кеч келишлари билан боғлади. Сарой вакилининг айтишича, концертга эшиклар соат 17:30 дан очилади, аммо одамлар концертга тақаб келишади.
Сарой вакилига аслида одамларнинг концерт вақтига яқин вақтда келиши одатий ҳол эканлигини, бироқ бу каби воқеа аввал бўлмаганини айтдик. Муаммо одамларни ичкарига киритилиши яхши ташкил этилмаганлигида эканлигини айтганимизда эса, у бунга сабаб қилиб, юқоридаги чипталар билан юз берган ҳолат сабабли ташкилотчилар томонидан назорат кучайтирилганлиги ва одамлар ҳавфсизлиги юзасидан ҳар бир ташриф буюрувчи синчковлик билан текширилганини айтди.
Ҳамма ерда иш вақти соат 18:00 тугашини инобатга олсак, томошабинлар концертга яқин вақт қолганида ташриф буюриши табиий ҳол, бироқ бу уларни эшик олдида тирбанд қилиб, олиб ўтиришга сабаб бўла олмайди-ку. Наҳотки, бутун бошли концертларни ташкиллаштираётган мутасаддилар масаланинг бу томонини беэътибор қолдирсалар? Наҳотки, байрамона кайфиятда концертга ташриф буюрганлар уни кўришдан олдин мана шундай нохуш вазиятларга дуч келмасликларини таъминлашнинг иложи бўлмаса?
Биз юқоридаги масалага ўз фикримизни билдирдик, бу борада сиз нима дейсиз Фикрларингиз биз учун муҳим.
