Австралия бош вазири Тони Эбботт мамлакатнинг денгиз кемалари ҳаракат хавфсизлиги бошқармаси (AMSA) Malaysia Airlines авиакомпаниясининг йўқолган Boeing 777-200 самолётига тегишли бўлиши таҳмин қилинган иккита бўлак топгани ҳақида маълум қилди.
Рейтер ахборот агентлигининг хабар беришича, Ҳинд океани жанубида давом этаётган қидирув ишларидан ишончли маълумот келиб тушди. Австралия денгиз кемалари ҳаракат хавфсизлиги бошқармаси сунъий йўлдош орқали йўқолган лайнерга тегишли бўлиши мумкин бўлган иккита жисм ҳақида маълумот олди, - дейди Эбботт ўзининг парламентдаги чиқишида.
AP ахборот агентлигининг хабар қилишича, кўрсатилган жойга Австралия ҳарбий ҳаво кучлари самолёти жўнатилган.
Аввалроқ Малайзия ҳукумати лайнер ўз йўналишини Ўрта Осиё томон ўзгартирган бўлиши мумкинлиги ҳақида хабар берган эди.
Эслатиб ўтамиз, 8 март куни Малайзия авиакомпаниясига қарашли бўлган самолёт парвозга чиққанидан икки соат ўтгач, сирли тарзда ғойиб бўлган. Boeing бортида 14 мамлакатдан 239 киши бўлган. Айни дамда лайнернинг қидирув ишларида 26 та мамлакат иштирок этмоқда.
