Стилист Марк Бастос ҳар якшанба кўчага чиқиб, уйсизларнинг сочини текинга олиб қўяди.
Маркнинг мақсади — одамларга озгина бўлса-да, яхшилик улашиш.
Дам олиш куни Марк Бастос соч турмагига муҳтож бўлганларни излаб, шаҳар кезади. Унинг одатий “мижозлари” — уйсизлар ва фақирлардир. Керакли одамни топганидан кейин у: “Бугун мен сиз учун бир яхшилик қилмоқчиман”,дейди.
Якшанба куни Марк ўртача олти нафар муҳтожнинг сочини турмаклайди. Бу билан жилла қурса, ҳеч вақоси йўқ одамнинг кўнглига ўз ҳаётини ўзгартириш умидини уйғотмоқчи бўлади. Ахир инсонга иккинчи имконият бериш керак, шундай эмасми?
Марк ўз ишлари ва уйсиз, фақирларнинг кўрган-кечирганларини Instagram`даги аккаунтида ёритиб боради.
Бу анъана Маркда 2012 йили оиласини кўриш учун Филиппин оролларига борганда пайдо бўлган. У ерда Марк эски сартарошхонадан курси сотиб олиб, камбағал оилалар фарзандларининг сочларини текинга олиб қўйганди.
“Биласизми, бу туйғу шундайин латиф эдики, ушбу ижобий ҳиссиётни Нью-Йоркка олиб кетишга аҳд қилдим”, дейди Марк.
Уйсизларнинг сочини турмаклаб, уларнинг ўтмишини омма билан бўлишиш Марк учун анъанага айланди. Ҳатто Ямайка, Коста-Рика ва Лос-Анжелесга қилган сафарларида ҳам ҳар якшанба янги “мижоз” ахтариб, кўчага чиқадиган бўлди.
Бир куни Марк севган қизи билан сайр қилиб юриб, ўзининг ташқи кўринишини ўзгартириб беришини сўраган одамга дуч келади. Ёшлар ундан қандай таомни яхши кўришини сўрашганда, жавобан қуйидагини эшитишади: “Ҳеч ким мендан нима ейишимни сўрамаган. Одатда овқат қолдиқларини ейман”.
“Биз кўпинча ёрдам беришимиз мумкин бўлган одамлар ёнидан жимгина ўтиб кетаверамиз, аслида эса ёрдам қўлини чўзишдан осон иш йўқ”, дейди стилист.
“Бунинг исми Жемар Бэнкс, унинг сочини турмаклаётганимда ва ҳатто овқатга таклиф қилганимда, у миқ этмади. Сочини турмаклаб бўлганимдан кейин унга кўзгу бердим. Жемар биргина жумла айтди: “Билмайсизми, ким менга иш бераркин?”, деб эслайди Марк.
“Одамларнинг сочини салонимда эмас, кўчада тарашлашимнинг сабаби бор. Ўткинчи одамлар эзгулик қилиш учун илҳомланишларини истайман. Яхшиликни ўз билганимча қиламан, буни кўрган одамлар эса эзгуликнинг бошқачароқ усулини топишади. Ҳатто оддийгина табассум ҳам кўп нарсани ўзгартириши мумкин”, дейди Марк Бастос.
