Рио-де-Жанейрода Олимпиада ва Паралимпия ўйинлари давомида шаҳарнинг кам таъминланган аҳолиси сайёрамизнинг энг яхши ошпазлари тайёрлаган таомлардан татиб кўришлари учун ресторан очилганди...
Шундай бўлдики, Олимпиада қишлоғи ресторанлари учун сотиб олинган маҳсулотлар жуда кўп чиқди. Бундан хабар топган бразилиялик бош ошпаз Дэвид Герц ва унинг итальян ҳамкасби Массимо Боттура бу маҳсулотларни Рионинг кам таъминланган аҳолисига сарфлашни лозим топишди.
Шунда кам таъминланганлар бепул овқатланиши мумкин бўлган ресторан очилди.
Герц ва Боттуранинг жамоасига Ер шарининг барча бурчакларидан 45 нафар бош ошпазлар қўшилишди ва "Refettorio Gastromotiva" лойиҳаси муваффақиятли старт олди.
“Биз исрофгарчиликка қарши чиқиб, очлик билан курашамиз ҳамда одамлар муносиб равишда овқатланишлари учун имконият яратдик”, деганди ўшанда Дэвид Герц.
Олимпиада ўйинлари якунланганидан сўнг эса ресторан “ўз тушлигинг учун пул тўлаб, муҳтож одам учун бепул таом ҳадя эт” тамойили асосида ишлай бошлади.
Бундай ташаббус бирдамлик асосида замонамизнинг кўплаб муаммоларини ҳал этиш мумкинлигини жамиятга намойиш этишнинг энг зўр имкониятларидан бери деб ҳисоблаймиз.
