Хитой ўзининг ҳарбий кучларини Яқин Шарқда кучайтириш ва иккинчи чет эл ҳарбий-денгиз базасини барпо этиш истагида, дея хабар берди Ria.ru нашри.
Нашрнинг таъкидлашича, Хитой Покистондаги стратегик муҳим бўлган Гвадаре порт ёнида ҳарбий-денгиз базасини барпо этишни режалаштирмоқда. Бу порт Хитой- Покистон иқтисодий йўлининг ва ХХР раиси Си Цзиньпиннинг “Бир минтақа, бир йўл” ғоясининг асосий қисмларидан биридир.
Пекиннинг мазкур хатти-ҳаракати унинг Покистонни, жумладан, Ҳинд океанини ҳарбийлаштириш (милитаризациялаш) истагида эканлигини англатади.
Экспертларнинг маълум қилишича, Ҳиндистон флотининг ҳудуддаги тажрибаси ва имкониятлари Хитой ва Покистонникига қараганда кенгроқ ва кучлироқдир.
Олдинроқ, 2017 йилнинг ёзида Ҳиндистон ва Хитой ўртасидаги алоқалар Доклам платосидаги можаро туфайли ёмонлашган эди. Ҳиндистон ҳарбийлари хитойликларни, Доклам платосидан автомобил йўли қуриш ишларини бошлаганидан сўнг сиқиб чиқарган эди. Кейинроқ ХХР ташқи ишлар вазирлиги қурилиш бўлаётган ҳудуд яна Хитой ҳарбийларининг назорати остида эканлигини хабар берган эди. Бироқ август ойининг охирида томонлар платодаги харбийларни тарқатиб юборишга келишишган эди.
