Дадаси – режиссёр Ҳилол Насимов изидан бораётган Фотиҳ Насимовни бугун ўзбек киноихлосмадлари яхши танишади. Бир қатор фильмларда суратга тушиб, маҳоратини намоён эта олган актёрни суҳбатга чорладик...
— Фотиҳ, 2017 йил сиз учун сермаҳсул йиллардан бири бўлди. Юртимизда учинчи маротаба ўтказилаётган «Prologue» фестивалида «Энг яхши эркак роли» номинацияси ғолиби дея эътироф этилдингиз.
— Биринчи ўринда фестевалнинг ўзи ҳақида икки оғиз гапириб ўтишни истардим. Чунки ўтган йилги Ёш ижодкорлар суратга олган қисқа метражли фильмлар Республика III фестивали умумий жиҳатдан ва айниқса, ташкилий томондан юксак даражада ўтди. Тақдим этилган фильмларнинг савияси баланд эканини ҳам айтиш лозим. Энг асосийси, бу фестиваль кейинги йилларда Халқаро босқичга ўтгани биз, ёшларга катта имкониятлар эшигини очмоқда.
Мени «Устунсиз уй» фильмидаги ролим учун тақдирлашганига келсак, бу икки карра қувонч бағишлади. Режиссёр Санжар Султонов билан мазкур фильмда ҳамкорлигимиз шундай яхши натижа берганидан мамнунман.
— Бу номинацияда айнан сизнинг исмингиз янграшини кутганмидингиз?
— Агар ҳозир тақдирланишимни кутмагандим, десам ёлғон гапирган бўламан. Сабаби, ҳар бир ижодкор каби мен ҳам рағбат истадим. Лекин худди шу номинация бўйича ғолиб бўлишимни кутмаганман. Саҳнада исмим янграганида кўнглимдан нималар ўтганини сўз билан изоҳлаб беролмайман. Аммо ҳаммасидан ҳам, фестиваль давомида Али Ҳамраев, Карим Мирҳодиев каби устозларимиз ролим ҳақида илиқ фикр билдиришгани олтиндан қиммат мукофот бўлди, мен учун.
— Ҳилол аканинг баҳоси қандай бўлди?
— Дадам ўша куни ёнимда эдилар. Албатта, биринчи бўлиб мени табриклаб, ютуғимдан хурсанд бўлдилар. Ютуқларимизда ота-онанинг ўрни жуда катта. Шундай экан, фурсатдан фойдаланиб, менга шундай тарбия ва билим берган, санъатга кириб келишимга сабабчи бўлган ота-онамга миннадорлигимни айтмоқчиман. Келажакда ҳам уларнинг ишончини оқлашга астойдил ҳаракат қиламан.
— Ҳилол Насимов режиссёр бўлмаганида Фотиҳ Насимов актёр бўлармиди?
— Менимча, йўқ. Чунки инсон бирор йўлни танлашида кимдир, албатта, сабабчи бўлади. Болалигимдан кино нималигини танитган, унга меҳримни оширган – дадам.
— Дадангизнинг қайси маслаҳатларига доим амал қиласиз?
— Ҳозир режиссёрлик йўналиши бўйича таҳсил оляпман. Ижодий ишларим устида изланаётган пайтим дадамнинг «Режиссёр бошқаларга қараганда бир қадам олдинда юриши керак. У одамларни тўғри йўлга йўналтира олиши шарт» деган гапларини доим ёдда тутаман. Бу фикр мен учун бир умрлик сабоқ.
— 2018 йилдаги режаларингиз билан таништирсангиз?
— Бу йил режиссёрлигимдаги қисқа метражли «Мусаввир» деб номланган бадиий фильмни тақдим этаман. Япон ёзувчиси ҳикояси асосида суратга олинган бу фильм томошабинларга ҳам манзур келади, деган умидим бор.
ФАКТ:
- Фотиҳ Насимов 1996 йилда туғилган.
- Айни кунларда Ўзбекистон Санъат ва Маданият институтининг режиссёрлик йўналишида таҳсил олмоқда.
- Шу кунга қадар 20 дан ортиқ бадиий, ҳужжатли ва қисқа метражли фильмларда суратга тушган.
Алия СУЛАЙМАНОВА
