Москва шаҳрининг Ново-Переделкино туман полициячилари танишининг уйидаги маймунни ўғирлаб, кейин ўлдирган эркакни қўлга олди, деб хабар берди Ntv.ru нашри.
Полицияга 40 ёшли москвалик аёлдан ариза келиб тушган. У ўз аризасида уйига келган меҳмонлардан бири маст ҳолда катакда ўтирган маймуннинг жиғига теккангини, жаҳли чиққан маймун эркакни тишлаб олганлигини, маст эркак эса уй эгасини итариб юбориб, катак ичида бўлган маймунни олиб қочиб кетганлигини маълум қилган. Кузатув камералари унинг маймун билан подъезддан чиқиб кетаётганлигини видеога олган.
Эркак маймунни ўласи қилиб калтаклаган. Полициячилар маймуннинг жасадини эркакнинг уйи яқинидан топишган. Муқаддам бир неча маротаба судланган 34 ёшли эркак аёлга 100 минг рубллик моддий зарар етказганлиги аниқланди.
Полиция эркакка нисбатан “босқинчилик” айби билан жиноят иши қўзғатган, яна бир “ҳайвонларга нисбатан шафқатсиз муносабатда бўлиш” моддаси юзасидан ҳам жиноят иши қўзғатиш масаласи кўриб чиқилмоқда. Эркак қамоққа олинган.
