Жанубий Корея прокуратураси чўкиб кетган “Севол” кемаси капитанига расман айблов қўйди. CNN телеканали хабар қилишича, кема капитани умрбод қамоқ жазосига ҳукм қилиниши мумкин.
“Ли Чун Сок(капитан) кема тезлигини камайтирмай хавфли бурилиши оқибатида “Севол” кемасини чўктирганликда айбланмоқда. Ли йўловчиларни эвакуация қилиш мажбуриятни бажармай, кўплаб одамларни ҳалокатга олиб келганлиги учун ҳам айбланмоқда”,-дейди прокурор Ли Бонг Чан.
Унинг сўзларига кўра, капитан айбдор деб топилса, унга 5 йилдан то умрбод қамоқ жазоси берилиши мумкин.
“Ренхап” ахборот агентлигининг хабар қилишича, 68 ёшли капитан ва унинг икки ёрдамчисини қўлга олиш учун Мокпхо шаҳри суди ордер берган. Ҳукумат уларни суд ҳукмидан қочиб, ўзларига қарши бўлган далилларни йўқ қилиб юбормасликлари асосида қўлга олди. Терговчилар берган маълумотларга кўра, капитан йўловчи қиёфасида чўкаётган кемани биринчилардан бўлиб тарк этган. Бундан ташқари, йўловчилар кема экипажи одамларни эвакуация қилишнинг ўрнига уларни ўз жойларида қолишга чақиришганини айтишмоқда.
Шунингдек, Қутқарувчилар 16 апрел куни Жанубий Корея соҳилларида ҳалокатга учраган “Севол” кемаси ичига киришни уддалашди.
У ерда яна уч кишининг жасади топилди, дея ёзади ИТАР-ТАСС ахборот агентлиги. Аммо, сув остида бўлиш вақти чегараланганлиги сабабли жасадларни ташқарига олиб чиқиш имкони бўлмаяпти. Энди 32 киши ҳалок бўлган ва 264 киши бедарак йўқолган деб ҳисобланмоқда. Йўловчи кемадан 179 киши қутқариб олинган.
"Севол" йўловчи кемаси чоршанба куни тонгда ҳалокатга учраган. Кема бортида 475 киши бўлган уларнинг аксарияти Чужудо оролига саёҳатга отланган мактаб ўқувчилари бўлган.
