Россиянинг Калининград вилояти Краснознаменск туманида жойлашган ташландиқ омборхонада тунаган болани мушук совуқдан асради, деб хабар берди lenta.ru нашри.
Йўқолишдан илгари 13 ёшли Руслан П.ни сўнгги маротаба 25 январь куни мактабда кўришган. У 26 январь куни топилди.
Боланинг полицияга маълумот беришича, у бир неча кундан кейин 14 ёшга тўлиши керак бўлган. Эрталаб Руслан мактабга боришнинг ўрнига расмга тушиш ва тезроқ паспорт олиш мақсадида туман марказида яшовчи бувисиникига йўл олган. Бироқ бувисининг уйда йўқлигини кўриб, пиёда ортига қайтган.
Қоронғи тушганда бола йўлда учраган ташландиқ омборхонага кўзи тушиб, шу ерда тунашга қарор қилди. Бу ерда у дайди мушукни учратди. Мушук уни кечаси билан иситиб, совуқдан асради.
Руслан мушукнинг яхшилигини қайтариш учун, уни ўзи билан уйига олиб кетди. Бир сутка давомида Русланни қидирган полициячилар эртаси куни уни мушук кўтарган ҳолда йўлда учратишди. Бола мушукка “Қутқарувчи”, деган лақаб қўйиб, жониворни асраб олди.
