“Sevimli Tv” да намойиш этилаётган “Ичкарида” турк сериали кўп сонли томошабинларни эътиборини тортди, десак адашмаймиз. Болалигида айрилган икки ака-ука, асли ҳақиқатни билмай катта бўлиши ва йиллар давомида бир-бирига қасдма-қасд курашишлари устига қурилган воқеалар ривожи унга бўлган қизиқишни янада оширмоқда. Қуйида бош қаҳрамони Умутнинг ҳаёти ва ижоди ҳақида маълумотларни ўқишингиз мумкин.
Оиласи ва шўх болалик...
Чагатай Улусой —томошабинларга Умут исми билан таниш бўлган бу актёр 1990 йил Станбулда туғилган. Дадаси асли Болгариядан, онаси эса Босниядандир. Оилада акаси Аталай билан биргаликда улғайишган. “Кичикиналигидан шўх бола бўлган. Бир ерда тинч ўтирганини кўрмасдик” дейди актёрнинг онаси. Чагатай болалигидан спортнинг барча тури билан фаол шуғуланган.
Машҳур модель...
Мактаб тадбирларида эса Чагатай биринчилардан бўлиб иштирок этарди. Шунинг учун ҳам унинг ўқитувчилари доим “Чагатай актёр бўлади” деган тахминлар қилишарди. Ташқи кўриниши ҳам келишган бўлажак актёр ўз фаолиятини санъат ва маҳорат мактаби ҳамда моделлик бизнесидан бошлаган. Сўнгра эса режиссёрларнинг назарига тушиб, кинога ҳам илк қадамларини қўяди. Чагатай Улусой мактабни тамомлагач, Истанбул университетининг Ландшафт архитектура факультетига ўқишга киради. Ўқиш давомида параллел актёрлик маҳорати дарсларига қатнаб, қўшимча даромад топиш мақсадида моделлик фаолиятини ҳам олиб борган. Шуни алоҳида айтиб ўтиш керакки, актёр айни кунларда реклама оламида ҳам жуда фаол. 2010 йил эса “Туркиянинг энг яхши эркак модели” деб эътироф этилган.
Кинога илк қадам...
2011 йил Чагатай ўзининг илк ролини “Бургут тимсолида” фильмида ижро этган. Бош қаҳрамон образини гавдалантирган актёр, ўша заҳоти кинотанқидчиларнинг мақтовларига сазовор бўлганди. Сўнгра, шу йилнинг ўзида “Уни Фахрия, дея номладим” деган сериалда бош қаҳрамон ролига таклиф этилган. Бу чиқиш Чагатай учун катта муваффақият ва машҳурлик олиб келган. Кейинчалик “Эмир йўли” сериали билан ижодий парвозини янада юксалтиради. “Сувнинг кўтарилиши”, “Ичкарида” сериаллари эса уни Туркиянинг энг рейтинги баланд актёрига айлантирган.
Алия СУЛАЙМАНОВА тайёрлади
