Австралияда 19 ёшли Жошуа Хайден (Joshua Hayden) кенгуру овлашга жазм қилди, бироқ ўзи кенгурунинг ҳужумига учради, деб хабар қилди lenta.ru нашри.
Воқеа Австралиянинг ғарбий қисмидаги Келлерберрин шаҳрида рўй берди. Жошуа акаси билан бирга тунги овга йўл олди. Йигит юриб кетаётган автомобилнинг ойнасидан бош чиқариб, кўзга ташланган учта кенгуруни нишонга олди. Буни кўрган кенгурулар қарши ҳужумга ўтишди.
Жошуа ўқ узишга улгурмасдан, кенгурулардан бири унга кучли зарба берди. Жошуанинг айтишича, у 30 сония давомида ҳушини йўқотган ва акам урди, деб ўйлаган. Аслида кенгуру олд ойнага сакраб, йигитнинг жағига тепган.
Шифокорлар Жошуанинг жағи синганлигини аниқлашди. Операцияни бир ҳафта кутишга тўғри келди, чунки йигитнинг юзи жуда шишиб кетган эди.
