Филипп Киркоров қизини олимпиада ғолиби сифатида кўришни орзу қилмоқда, деб хабар берди НТВ телеканали.
Эстрада қироли 6 ёшли қизи Алла-Виктория ва 5 ёшли ўғли Мартинларнинг омма олдида ўзларини эркин тутишларидан фахрланишини ҳеч кимдан яширмайди.
Алла-Виктория ва Мартин ўтган йили ёзда, Сочида илк маротаба катта саҳнага қадам қўйишган эди. Филипп Киркоров ўшанда фарзандлари учун жуда ҳаяжонланган эди. Бироқ болалари унинг юзини ерга қаратишмади. Энди эса Филипп Киркоров қизининг конькида учишини истамоқда. Унда бундай истак бўлишига Яна Рудковская ва Евгений Плющенконинг ўғиллари сабаб бўлди.
Беш ёшли Саша, яъни Гном Гномич ёш бўлишига қарамай, ҳамма нарсага улгуради. У мода журналларида фотосессияларда қатнашади, фигурали учиш бўйича ҳам рекорд натижаларга эришган. Кичик Плющенко кунига бир неча соат вақтини муз устида ўтказади. У “Щелкунчик” мюзиклида кунига 2 маҳал, умумий ҳисобда 20 маротаба катталар билан бир сафда шоуда иштирок этди.
