Жарроҳнинг айби туфайли оёғидан ажраган 27 ёшли модель Розалина Октавия яна подиумга қайтди ва Models of Diversity хайрия ташкилотининг элчисига айланди, деб хабар берди Lenta.ru нашри.
2010 йилда мотоциклда кетаётган Октавия автофалокатга учраган ва оёғининг пайларини жароҳатлаган. Олган жароҳатидан қиз юришга, югуришга қийналган. Шундан кейин шифокор ҳузурига борган. Октавия жароҳатланган пайларини тиклаш учун Индонезиядаги касалхоналардан бирига даволаниш учун ётган.
Ўтказилган жарроҳлик операциясидан кейин қизнинг тиззаси шишиб кетган, шиш ҳафта давомида кетмаган. Бошқа касалхонага кўринишга борганда, унга операцияни амалга оширган шифокор хато қилиб, артерияларидан бирини кесиб қўйганлигини маълум қилишган. Октавиянинг оёғига бошқа томир кўчириб ўтказилган, бироқ қон яхши айланмаганлиги сабабли гангрена бошланган. Шундан кейин шифокорлар унинг оёғини кесиб ташлашга мажбур бўлишган.
Октавия оёғидан айрилгунга қадар касалхонада доя бўлиб ишлаган, шу билан бирга моделлик ҳам қилган. У оёқсиз қолганда ҳам мода дунёси эшиклари ногирон қиз учун ёпилмаслигига умид қилди. Октавия бир йил илгари Сингапурга кўчиб ўтиб, яна моделлик билан шуғуллана бошлади. Шундан кейин уни профессионал суратга олиш ишларига таклиф қилишди ва Октавия Singapore Fashion Runway шоусида иштирок этди.
Мазкур модалар намойишидан сўнг у Models of Diversity хайрия ташкилотининг элчисига айланди.
