Турк актёри Берк ЖАНКАТ “Кўсем” сериалида болалигида йўқолган шаҳзода Яҳё-Искандар ролини ижро этган. Ёш актёрнинг иқтидори ва машҳурлиги “юлдузлик касаллиги”га чалинишига асло сабаб бўлмаган...
РАСМ ДАРСИ
Бўлажак акётр архитекторлар оиласида дунёга келган. Қаламлар худди қошиқ ва санчқидек ҳар куни ишлатиладиган муҳитни вояга етган. Шу боис Берк болалигиданоқ бўш вақтида расм чизиш билан шуғулланган. Анқарадаги Билькент санъат институтининг график дизайн факультетига ҳужжат топшириши ҳам табиий эди. Университетни тамомлаб, Истанбулга жўнайди ва маълум вақт ўз соҳасида ишлайди. Ўша вақтда Жанкатнинг дизайнга қизиқиши сўниб, актёрлик қобилияти ниш ура бошлаши ҳеч кимнинг, ҳатто ўзининг ҳам хаёлига ҳам келмаганди. “Актёр бўлишни орзу қилмаганман. Бу қизиқиш қадамба қадам пайдо бўлган. Ролга тайёрланиш жараёнида ҳам исталган ҳаваскор уддалай оладиган ишларни қиламан. Ютуғим — тақдир билан баҳслашмайман”, дейди актёр.
ТЕАТ – ДАВО МАСКАНИ
«Юқори синфларда ўқиб юрган кезларим ҳаваскорлар театр труппасида иштирок этардим. Кейинчалик театр йўналишида “Муҳташам юз йил” сериалидаги Хюррем роли орқали яхши таниш бўлган Вахиде Гердюмнинг театр студиясида таҳсил олдим. Бироз вақт ўтгач, “Сенга сирни очаман” сериалидан таклиф тушди, у илк ролим эди”, дейди актёр.
Жанкат спектакль саҳналаштирилганда устозлари Вахиде Гердюм ва Живан Жановага ассистентлик ҳам қилган. Шу боис ҳам Жанкатга сериалларда роль ижро этиш қийинчилик туғдирмайди. Театр ҳақида сўз борганда “Театр мен учун энг яхши терапия. Одамларга совуққон бўлиб кўринишим мумкин. Бироқ гапиришдан кўра ўйлашни авзал биладиганлар тоифасиданман”, дейди актёр.
«КАМЕРА ҚАРШИСИДА ДОНГ ҚОТГАНМАН»
Вазминлик ва соддалик суратга олиш майдончасида ҳам ўз сўзини айтган. «Очиғи, ўзимни “синдиришим”га тўғри келган. Табиатан эътиборни ўзимга жалб қиладиганлар тоифасидан эмасман. Омма орасида-ку сувга тушган тошдек бўлиб кетаман. Бу одатларимдан воз кечиш учун вақт керак бўлди», дейди актёр.
Актёр учун илк тўсиқ бу – камеранинг шафқатсиз “нигоҳи” бўлган.
«Театрда томошабин кўз ўнгида роль ижро этишга ўргангандим. Камера қаршисида эса донг қотганман», дейди хотира “китоб”ини варақлаб. Иккинчи план роль насиб этганда, эътиборга лойиқ эканини икки карра кўпроқ исботлашига тўғри келган. “Сенга сирни очаман” сериалида Экин Коч билан бирга роль ижро этган. Вақт ўтиб, икки актёрнинг Аҳмад ва Искандар ролида чиқиши томошабинлар учун ҳақиқий совға бўлган. Севги ва ҳукмронлик учун рақобатчига айланадиган бу икки актёр “Сенга сирни очаман” сериалидаги иштирокидан бошлаб дўстга айланишган.
Актёрнинг кинодаги илк бош роли “Қишлоқлик гўзал” романтик комедиясида бўлган. Мазкур комедия актёрга машҳурлик онларини тақдим этган. Айнан шу комедиянинг сўнгги қисмида суратга тушаётганида “Кўсем” сериалининг киносиновида иштирок этиш таклифини олган. Киносинов енгил ва омадли ўтган.
ЁЛҒИЗ ШАҲЗОДА
Қаҳрамонимизнинг тарихий прототипи шаҳзода Яҳё ҳаётда ҳам бўлган. Бироқ у Сафия султон хонимнинг ўғли эмас, султон Муроднинг бир жориясининг фарзанди эди. Бошқа манбаларга кўра у султон Аҳмаднинг укаси сифатида қайд этилган. Ҳар икки вазиятда ҳам Искандар тахт учун курашади. «Искандар ролини ижро этишда унинг феъл-атвори қийинчилик туғдирди. “Искандар қандай инсон бўлиши керак? Қандай сўзлашади, юриши қанақа? Нимани яхши кўради?” каби саволлар устида кўп бош қотирдим. Сериал сюжетига кўра Искандар Австриядан келиб, яничарларга қўшилиб қолади. Бу ролни ижро этиш учун вазн ташлашимга ҳам тўғри келди. Бундан ташқари, отда юриш ва қилич ишлатишни ҳам ўргандим», дейди актёр.
“ИЛК ҚАДАМНИ ТАШЛОЛМАЙМАН”
Актёр бўш вақтида сокин ҳаёт тарзини олиб боради: расм чизади, мутолаа қилади, спорт билан шуғулланади. Ошхонада ҳам ижод қилишни хуш кўргани учун ҳатто кулинария блогига ҳам ёзилган. Бироқ ҳали ўз жуфтини топишга улгурмаган. Бу ҳақда ўзи шундай дейди:
«Орзуимдаги қиз билан вақтим қувноқ ўтиши керак. У керак вақтда менга далда бўла оладиган дўст бўлиши лозим. Қисқаси, очиқкўнгил ва ўзига ишонган қиз – ҳаётим маликаси бўла олади. Нозик хилқат вакилларини тушунмаганим учун илк қадамни улардан кутаман. Бордию бирортасини ёқтириб қолсам, батамом сўздан қоламан».
- Берк Жанкат 1984 йилнинг 9 майида Анқарада туғилган.
Садоқат АЛЛАБЕРГАНОВА тайёрлади
