“Кўсем” сериалида томошабинларни бефарқ қолдирмаган қаҳрамонлардан яна бири бу – Cултон Усмон. Тарихда “ёш Усмон” номи билан қолган ушбу ролни турк актёри Танер Ольмез ижро этган...
Мусиқачилар сулоласи...
Танер Тунджели шаҳарчасида туғилган. 7 ёшида ота-онаси билан Истанбулга кўчиб келган. Танернинг барча оила-аъзоларига мусиқий қобилият берилган. Масалан, унинг акаси Тайлан Озгюр Олмез Туркияда машҳур хонанда, кўплаб қўшиқлар муаллифи ҳам. Камтарлик шиори бўлган бу оила ўзларини оммага кўз-кўз қилишни исташмайди.
Танерни санъат соҳасида карьера қилиши болалигиданоқ маълум эди. Боиси феъл-атвори, шеърларни тезда ёд олиши, ифодали ўқиши атрофдагиларни ўзига жалб қилиб келган.
Танер маълум вақт актёрлар, мусиқачилар ташриф буюрадиган кафеда официант бўлиб ишлаган. Ҳазил қилиб, мижозлар кўнглини олиш учун Танерда актёрлик қирралари яққол сезилиб турарди. Қолаверса, бўлажак актёр аъло даражадаги вокал қобилияти билан ҳам сийланган. Театр вакиллари орасида бўлган Танер Бакиркей театр труппаси аъзосига айланади. Бу ерда олган тажрибалари эса Истанбул Давлат унитверситети консерваториясига осонгина ўқишга кириш имконини беради.
“Афсонавий актёрлар сабабчи бўлган қарорим”
“Театр билан боғлиқ саргузаштларим аслида мактабда ўқиб юрган кезларим бошланган. Афсонавий санъаткорлар Суна Пекуйсал ва Зихни Гекта иштирокидаги операни кўриб лол бўлганман. Актёрлар томошабинлар орасида, аниқроғи ёнгинамда туриб ижро қилишган. Шунда “улардан бири бўлишим мумкин!” деган фикр ялт этиб хаёлимга келган. Театрдан чиқа туриб, бундан яхшироқ касб йўқлигини англаганман. Ўшандаёқ келажакда қайси касбни танлашим аниқ бўлган. Мактабда эса спектакль саҳналаштиришга ҳаракат қилиб кўрдим. Лицейни тамомлаш арафасида устозларимиз кўмагида Шекспирнинг “Ёз оқшомидаги туш” асарини саҳналаштирганмиз”, дейди актёр.
Талабалик йиллари Танер ўқишдаги репетициялар билангина чекланиб қолмади. Доим олға қадам босишни хуш кўрувчи Танер 23 ёшида катта лойиҳа – “Катта бозор” телесериалига таклиф этилади. Мазкур илк роли билан параллел равишда “Кул ва олов” сериалида ҳам иштирок этади. Актёр ўшандоқ “ҳар йили битта лойиҳада иштирок этишим керак”, дея олдига мақсад қўяди. Сўнг “Истанбул олтини” сериали, “Узун тарих” фильмларида тажриба оширади. 2012 йили “Йўқолган шаҳар” номли машҳур сериалда ҳам асосий роллардан бирини ўйнади. 2013 йили халқ қаҳрамони ҳақидаги “Татар Рамазан” фильми катта экранларга чиқди. Мазкур фильм Греция, Болгария, Австралия ва араб давлатларида намойиш қилинди. Танернинг ушбу катта лойиҳадаги иштироки 2016 йилда суратга олинган “Кўсем”даги Усмон роли учун асқатади. “Кўсем”дан сўнг севимли саҳнасини тарк этгани йўқ. “Бўш шаҳар” спектаклида роль ижро этди.
“Актёр учун ҳар бир роль янги тажриба беради. Баъзиларини драмалаштирмаса, кўпчилик фожиалар кулгули туюлади. Гоҳида томошабин нафратига ҳам учраш мумкин. Лекин ортга назар ташлаб, ҳар бир қаҳрамонимдан миннатдор бўламан”, дейди актёр.
Ҳақиқий машҳурлик осонликча берилмаган
Танер Олмезга ҳақиқий машҳурликни “Кўтарилиш” сериалидаги роли олиб келган. Севги ҳақидаги ушбу романтик сериал ўндан ортиқ давлатларда намойиш қилинган. Бу шон-шуҳрат, омад актёрга осонликча берилмади.
“Сценаристлар, режиссёрлар билан йиғилиб, ақлий “ҳужум” қилганмиз. Актёрнинг меҳнати айнан тайёргарлик жараёнидан бошланади. Сўнг қаҳрамонинг билан ёлғиз қоласан, танишасан... Қолаверса, елканли спорт туридан дарс олиб, тўққиз килограм вазн ҳам ташладим”, дейди актёр.
Танер Олмез актриса Ойкю Караель (Дилрабо султон) билан партнер бўлиб ўйнаган “Қотил Жо” спектаклидаги роли учун мукофотга ҳам лойиқ топилган.
Саёҳатга муҳаббат
Танернинг ҳаётий режалари чегараланмаган. “Янги жойларни кўришни яхши кўраман. Шу боис истагим ортидан кўп давлатларга борганман. Аввало, Туркияни кезиб чиқдим. Истанбулда денгиз бўйлаб велосипедда сайр қилишни яхши кўраман. Университетда ўқиб юрган кезларим Европани поездда айланиб чиққандим. Саёҳат бу – менинг жон-у дилим”, дейди Танер.
* Танер Олмез 1986 йилнинг 1 январида туғилган.
Садоқат АЛЛАБЕРГАНОВА тайёрлади
