Кўпчилик киноихлосмандлар “Менинг инглиз беморим” фильмини яхши эслашса керак. Бугун ана шу фильмда асосий қаҳрамонлардан бири – шафқат ҳамшираси ролини ижро этган Жюльет Бинош 54 ёшни қаршилади. Бу ҳақда 24smi.org нашри хабар бермоқда.
Кино оламига 15 ёшиданоқ кириб келган Бинош кўплаб Оврўпа режиссёрларининг кинокартиналарида турфа ролларни ижро этган.
Айнан мана шу турли жанрлардаги, ҳар хил ракурслардаги киноасарларда (“Уч ранг: мовий”, “Полина”, “Верн нусхаси”, “Аёлнинг ўзга ҳаёти”, “Сўзлар ҳамда суратларда акс этган муҳаббат қиссаси” ва ҳ.к.) суратга тушгани ҳам актрисанинг омад калити эди, десак, муболаға бўлмайди, негаки Бинош анча-мунча тажриба орттиради.
Актрисага чинакам омад 1995 йили режиссёр Энтони Мингелланинг “Менинг инглиз беморим” фильмида бош персонажлардан бири – ҳамшира Ханнани ижро этиш бўлди.
Мазкур роли учун Бинош биратўла “Оскар”, BAFTA, Европа киноакадемияси ҳамда Берлин кинофестивалининг бош совринларини қўлга киритади. Фильм ҳам дунё бўйлаб нақд 230 млн. АҚШ доллар миқдорида “ақча” йиғади. Кейинроқ актриса Жонни Депп билан “Шоколад”, Жан Рено билан “Муҳаббат қиссаси”,Аль Пачино билан “Хавфли квартал”, Кристен Стюарт билан “Зильс-Мария” каби кўплаб мухлислар меҳрини қозонган фильмларда иштирок этади.
Киномухлислар яқинда киноэкранларда берилган “Қурол-аслаҳали арвоҳ” фильмида ҳам Жюльет Бинош ёш ва умидли актриса Скарлетт Йохансон билан биргаликда роль ижро этишди.
Нима бўлганда ҳам “Олға, Бинош!” деб қоламиз.
