Hamdan International Photography Award’нинг бу йилги танловида cуриялик фотожурналист Муҳаммад Алгариб ғолиб бўлди. У бошқа бир фотожурналист Абдулқодир Хабаканинг портлаш вақтида бир болани қутқараётганлиги акс этган фотосурати сабабли шуҳрат қозонди. Бу воқеа 2017 йилнинг апрель ойида Ғарбий Ҳалаб шаҳрида рўй берган. Ўша вақтда журналистлар тинч аҳолини гуманитар “коридор” орқали ўтаётганини суратга олаётган вақтда машиналарнинг бирида портлаш содир бўлган.
Машҳур фотосуратда Хабаканинг қўлида жароҳат олган бола акс эттирилган. Кейинроқ фотосуратчи ўша вазият ҳақида фикр билдирар экан қуйидагиларни айтиб ўтди: “Болани кўтариб қочаётганимда атрофимдаги инсонлар уни аллақачон вафот этганини айтишди, лекин мен ўша вақтда зўрға нафас олаётганини кўргандим, шу боис болакайни кўтарганча югургандим”.
Танлов ташкилотчилари Абдулқодир Хабакани шунингдек, жасорати учун махсус соврин билан тақдирлашди, деб ёзади Azon.uz портали.
