Екатеринбургдан Анталия томон парвоз қилаётган самолёт бортида маст эркак тўполон кўтарди, деб хабар берди Vesti.ru нашри.
Самолёт қўнишидан сал илгари у ёнида ўтирган аёл ва болаларни ҳақорат қилган, бу камлик қилгандек, уни тинчлантирмоқчи бўлган борт кузатувчисига қўл кўтарган. Безори йўловчи самолёт бортидаги йўловчилар ёрдамида ҳуқуқ-тартибот идораси ходимларига топширилди.
“У парвоз давомида ароқ ичиб келди. Ароқ тугагач, ёнида ўтирган аёллар ва болаларни ҳақорат қила бошлади. Самолёт қўнишига 20 дақиқа қолганда, ҳамма жойида қимирламай ўтириши керак бўлган вақтда, йўловчилар ўрнидан туриб, маст эркакдан қочишга мажбур бўлишди”, деб ҳикоя қилди йўловчилардан бири бўлган Валентина исмли аёл.
Аёлнинг маълум қилишича, эркак самолётни портлатишини айтиб таҳдид қилган, тинчлантирмоқчи бўлган одамларга нисбатан қўпол муносабатда бўлган.
