Ўтган йили Оҳангарон туманининг Овжазсой қишлоғида топилган улкан жонивор Тошкентдаги Геология музейида сақланмоқда.
“Халқ сўзи” газетасининг хабар қилишича, мазкур ноёб топилма устида олиб борилган илмий тадқиқотлар давомида у чиндан ҳам мамонтлар ўтмишдошлари — архидискодонларга тегишли экани тасдиқланган.
“Айни пайтда Ўзбекистон Миллий университети ҳамда Геология музейи геолог-палеонтологлари томонидан топилманинг айнан қайси даврларга оидлигини аниқлаш устида иш олиб борилмоқда”, дейилади хабарда. Дастлабки хулосаларга кўра, унинг ёши тахминан 1,2-1,8 миллион йилга тенг бўлиши мумкин.
“Илмий тадқиқотлар баробарида, топилмани имкон қадар асл ҳолига келтириш ва яхши сақланиши учун махсус ишлов беришга ҳаракат қилаяпмиз”, — дейди музей директори Аҳмаджон Аҳмедшоев.
Эслатиб ўтамиз, музей ташриф буюрувчилари экспонатни жорий йил охирларида томоша қилишлари мумкин бўлади.
