“Тошкент” халқаро аэропортида божхоначилар томонидан ўтказилган тезкор тадбир давомида қонунбузарлик ҳолатлари аниқланди.
“Пекин-Тошкент” йўналиши бўйича учиб келган республикамиз фуқароси, Хитойдаги Чан шу институти талабаси А.Ғ. “яшил” йўлак орқали бемалол ҳаракатланиб келар экан, божхона ходимининг оғзаки сўрови пайтида ҳеч қандай ортиқча товарлари йўқлигини маълум қилди.
Аммо унинг багажи божхона кўригидан ўтказилганда, ичида божхона декларациясида кўрсатилмаган ва божхона ходимининг оғзаки сўровида айтилмаган, жисмоний шахслар учун белгиланган олиб кириш меъёридан ортиқ бўлган, умумий нархи 23 946 750 сўмга тенг 100 қути тиббиёт игналари ва 1208 дона турли USB флэшкалар борлиги аниқланди.
Шунга ўхшаш яна бир ҳолатда “Сеул-Тошкент” йўналиши бўйича учиб келган фуқаро Х.Р. мамлакатимизга кириб келиш чоғида “қизил” йўлакни танлади.
Божхоначилар ушбу фуқарони қонунга итоаткор ва белгиланган меъёрдан ортиқ товарлари учун бож тўлайди деб хулоса қилишган эди.
Аммо ушбу фуқаронинг багажи божхона кўригидан ўтказилганда эса, унинг ичида йўловчи божхона декларациясида кўрсатилмаган ва божхона ходимининг оғзаки сўровида айтилмаган, жисмоний шахслар учун белгиланган олиб кириш меъёридан ортиқ бўлган, умумий нархи 10 057 635 сўмга тенг жами 14 дона турли уяли телефонлар борлиги аниқланди.
Ҳозирда ушбу ҳолатлар юзасидан тегишли ҳужжатлар расмийлаштирилиб, текширув ҳаракатлари давом эттирилмоқда.
