АҚШ Миллий хавфсизлик агентлиги собиқ ходими Эдвард Сноуден Россияда вақтинчалик яшаш гувоҳномасига эга бўлди. Гувоҳнома муддати 3 йилга мўлжалланган. Бу ҳақда Вести.ру нашри хабар бермоқда.
Ўтган йили Сноуден Россия томонидан муддати бир йил бўлган бошпана билан таъминланган эди. Вақтинчалик яшаш гувоҳномасини олиш фикри Сноудендан чиққан. Бу ҳақда собиқ агентнинг адвокати маълум қилди. Энди Сноуден яқин келажакда Россия фуқаролигини олиш имконига эга бўлади. Шунингдек, у энди бутун мамлакат бўйлаб ҳаракат қилиши ва чет элга 3 ойдан узоқ бўлмаган муддатга чиқиши мумкин. Акс ҳолда унинг вақтинчалик яшаш гувоҳномаси бекор қилинади.
Шунингдек, адвокат гап сиёсий бошпана ҳақида кетмаганини қайд қилиб ўтди.
Эслатиб ўтамиз, Эдвард Сноуден АҚШ махсус хизматининг кузатув дастурлари ҳақидаги махфий ҳужжатларни ОАВ вакилларига топширган. Ўтган йили Сноуден Россиядан сиёсий бошпана олган эди. Ватанида унга қарши махфий ҳужжатларни ошкор қилгани учун жиноий иш қўзғатилган ва у узоқ муддатга қамоқ жазосига ҳукм қилиниши мумкин.
