Таиландда 2009 йилдан бери илк маротаба жиноятчига нисбатан ўлим жазоси қўлланди, деб хабар берди Ria.ru нашри.
Душанба куни Бангкокнинг Банг Куанг марказий қамоқхонасида, ўлим жазосига маҳкум этилганлар сақланадиган алоҳида блокда жиноятчига ўлимга олиб келувчи инъекция қилинди.
Қатл этилган 26 ёшли Таиланд фуқароси бўлган жиноятчи 2012 йилда 17 ёшли талаба қизга 24 маротаба пичоқ урган. Қотил қизнинг уяли алоқа телефони ва ҳамёнини олиб воқеа жойидан қочиб кетган. Бироқ орадан бир неча соат ўтмасдан полициячилар уни қўлга олган эди. Суд унга ўлим жазосини тайинлади, мазкур жазони Таиланднинг аппеляция ва олий суди ҳам тасдиқлади.
Таиландда 2003 йилга қадар ўлим жазоси отиш орқали амалга оширилиб келган. 2003 йилдан кейин эса ўлимга олиб келувчи инъекция қўллана бошланди.
