Буюк Британияда дайди мушук то ҳайдовчи уни топиб олгунча, машина радиаторининг устида 120 километр йўл босди, деб хабар берди lenta.ru нашри.
Машина рулини бошқарган Стивен Кейн оиласи билан денгизда дам олиш учун 120 километр йўл босгандан кейингина мушукни топди. “Уни кўриб қолганим яхши бўлди. Мушук бу ерга қандай қилиб кириб қолганига ҳайронман”, деди Стивен.
Шундан кейин Стивен қўрқиб кетган мушукни қутқариш учун ҳайвонларни ваҳшиёна муносабатлардан ҳимоя қилувчи Қироллик ҳамжамияти вакилларини чақирди. Автомеханиклар ёрдамида машинанинг фара ва бамперлари ечилди. Мушук очликдан ҳолсизланиб қолган эди. Вакиллар уни қутқариш учун жароҳатланган думини кесишга мажбур бўлишди.
Стивен Кейн мушукка Ford Focus автомобили шарафига Форд, деб ном берди. Унинг акаси агар мушукнинг эгаси чиқмаса, ўзи боқиб олишга тайёр эканлигини билдирди.
