Бугун Ўзбекистон миллий терма жамоаси Дубайда навбатдаги ўртоқлик ўйинини ўтказади. Бу сафарги рақиб Баҳрайн термаси.
Ўзбекистон терма жамоаси шу кунгача Баҳрайн билан жами 9 та ўйин ўтказган бўлиб, уларнинг 3 тасида бизникилар ғалаба қилишган бўлса, 4 та учрашувда дуранг қайд этилган. 2 та ўйинда эса мағлубиятни тан олганмиз. Тўплар нисбати 11:8 - вакилларимиз фойдасига.
Хабарингиз бор, 6 октябрь куни терма жамоамиз аъзолари Доҳада Қатарга қарши майдонга тушиб, йирик ҳисобда мағлуб бўлишди. Ўша учрашувда Миржалол Қосимов асосан миллий чемпионатимизда тўп сураётган футболчиларни майдонга туширганини ҳам алоҳида таъкидлаш керак.
Бугунги ўйинда Ўзбекистон терма жамоаси таркибида легионер футболчилар майдонга тушиши кутилмоқда. Маълумотларга кўра, Қосимов чақирган барча легионерлар терма жамоамиз ихтиёрига етиб келган. Улар бугунги ўйинда майдонга тушишга шай бўлиб туришибди. Шу сабабли Баҳрайнга қарши бўладиган ўйинда вакилларимиздан мазмунлироқ ўйин кутишга ҳақлимиз.
Учрашув Тошкент вақти билан соат 19:00да бошланади. Ўзбекистон миллий терма жамоаси 14 октябрь куни Дубайда БАА термасига қарши яна битта ўртоқлик ўйинида майдонга тушиши режалаштирилган.
