Мактаб — муқаддас даргоҳ. Таълим, тарбия ўчоғи. Биз бу даргоҳда меҳнат қилувчи инсонларни ниҳоятда қадрлаймиз. Устозни отадек улуғ кўрамиз. Демак, мўътабар маскан раҳбари деганда, олийҳиммат, зиёли, ҳалол ва меҳнатсевар, бообрў одамни тушунамиз.
Шунинг учунми, гоҳида мактаб ёки у ерда фаолият кўрсатувчи инсонлар ҳақида танқидий фикр эшитиб қолсак, дилимиз оғрийди. Уни худди яқин кишимиз ҳақида билдирилган фикрдай қабул қиламиз. Ахир, бу даргоҳ ҳеч биримизга бегона эмас. Шундай экан, унинг тақдирига бефарқ қарай олмаймиз.
Достонбек Тошев (исм-фамилиялар ўзгартирилган) Ҳазорасп туманидаги умумтаълим мактабларидан бирининг директори эди. У бу лавозимда олти йилдан буён фаолият кўрсатиб келарди. Бироқ, унинг фаолияти таҳлил қилинганда лавозимига номуносиблиги аён бўлди. Уни мактабдаги таълим-тарбия жараёнини яхшилаш, ўқитувчилар меҳнатини муносиб рағбатлантириш, ижодий муҳитни шакллантириш, ёш авлодни ҳар томонлама комил инсонлар қилиб тарбиялашдан кўра ўз чўнтагини қаппайтириш масаласи кўпроқ қизиқтирган экан.
У 2013 йилнинг май ойида мактаб ишчи-хизматчилари номига ёзилган мукофот пуллари ва ойлик маошлари ўз жавобгарлигида ва ихтиёрида эканлигидан фойдаланиб, 12 нафар ходим номига ёзилган 3 миллион 133 минг сўм пулни ўзлаштириб юборади. Шунингдек, мактаб директори иш ҳақи тарқатиш рўйхатидаги яна тўрт нафар ходимнинг 1 миллион 622 минг сўм мукофот пулини қалбаки имзолар билан олиб, ўз эҳтиёжлари учун ишлатиб юборади.
Ачинарлиси, мактаб ҳисобчиси Н.Холбоев ҳам ўзининг раҳбаридан ўрнак олиб, у билан тил бириктирган ҳолда, ишчи-хизматчиларнинг ойлик иш ҳақларини пластик карточкаларга ўтказиб, 2012 йил апрель-октябрь ойларида, жами 1 миллион 704 минг сўм иш ҳақларини талон-торож қилишади. Бу ҳам етмагандек, ходимларнинг 2 миллион 613 минг сўм иш ҳақларини ўзларига яқин бўлган кишилар, жумладан, М.Худойберганов, Ф.Собирова, С.Жуманиёзоваларнинг номига очилган пластик карточкаларга ўтказиб, ўз эҳтиёжлари учун ишлатиб юборишади.
Шунингдек, директор Д.Тошев ҳисобчи Н.Холбоев билан бирга Ўзбекистон Республикаси Вазирлар Маҳкамасининг 2005 йил 21 декабрдаги қарори билан тасдиқланган "Умумтаълим муассасаларининг ўрнак кўрсатган ходимларини рағбатлантиришнинг директор жамғармаси тўғрисида"ги Низомнинг бандларини қўпол равишда бузиб, 2012 йил март-декабрь ойларида 14 нафар ўқитувчига 2 миллион 10 минг сўм, 2013 йил май ва август ойларида 17 нафар ўқитувчига 1 миллион 633 минг сўм рағбат пулларининг ва айрим ўқитувчиларга иш ҳақларининг ортиқча тўланишига йўл қўйиб, давлатнинг 4 миллион 395 минг сўм пул маблағларини ўзлаштириб олади.
Д.Тошевга ходимларнинг ҳақларини ўзлаштираётгани камлик қилиб қолган, шекилли, мактабни иситиш учун пул ўтказиш йўли билан сотиб олинган 1 тонна 800 килограмм кўмирни 198 минг сўмга сотиб юборади.
2013 йил 30 ноябрь куни мактаб билан "Туямўйин савдо" МЧЖ ўртасида шартнома имзоланиб, МЧЖ ҳисоб рақамига 1 миллион 774 минг сўм пул маблағлари ўтказиб берилади ва гўёки МЧЖдан шу пулга мебел жиҳозлари қабул қилиб олингани ҳақида ҳисоб-фактура тузилади. Бироқ, бу мебеллар мактабгача етиб келмайди. Бу каби мисоллардан кўриниб турибдики, Д.Тошевнинг ўз манфаатларини ўзгаларникидан устун қўювчи, ҳалоллик мезонларини унутган, қонун талабларига риоя қилишни истамаган шахслиги аён бўлди.
Юқорида таъкидлаганимиздек, ўқитувчилик шарафли касб. Бу касб эгаларининг ҳақига хиёнат қилиш, уларнинг ҳалол меҳнатлари эвазига олган даромадларини ўзлаштиришни ҳеч нима билан оқлаб бўлмайди. Бундай қилмишни содир этганлар муқаррар жазога лойиқдир. Д.Тошевга суд ҳукми билан тегишли жазо тайинланди.
манба: http://www.huquq-gazeta.uz
