Тошкент шаҳар ҳокимлиги Ахборот хизмати раҳбари Ҳусан Эрматов журналистлардан фақат пресс-релизларга асосланиб қолмасликни сўради, деб хабар бермоқда «Кун».
«Биз, шаҳар ҳокимлиги Ахборот хизмати, матбуот анжуманларида ортиқ пресс-релиз тарқатмасликни ўйлаб турибмиз», – деди Ҳусан Эрматов 10 октябрь куни бўлиб ўтган матбуот анжуманида.
«Масала шундаки, Миллий матбуот марказида ўтказилган бир қатор тадбирларимиздан сўнг, деярли барча нашрларда [шаҳар ҳокимлиги Ахборот хизмати томонидан тарқатилган пресс-релизларга асосланиб] бир хил гап-сўзлар ёзилди. Ваҳоланки, биз ҳар бир нашр ўз йўналиши, ихтисослигидан келиб чиқиб, тадбирларни кенгроқ ёритишларини жуда ҳам истардик», – деди Тошкент шаҳар Ахборот хизмати раҳбари Ҳусан Эрматов.
Эслатиб ўтамиз, аввалроқ Тошкент ҳокимлиги ноябрдан бир ойга режалаштирилган пойтахт кўчаларидаги қурилиш ва таъмирлаш ишлари рўйхатини эълон қила бошлашини маълум қилган эди.
