Тошкент вилоятининг Оҳангарон шаҳрида бир аёл душманидан ўч олиш ниятида икки йигитни жиноят кўчасига етаклади.
Гап шундаки, новвойлик билан шуғулланувчи Назокат Мажидова (исм-фамилиялар ўзгартириб берилмоқда) асли бўкалик Самариддин Исломовни душмани Наргизанинг уйига ўғриликка тушишга мажбур этади.
Наргиза ҳам новвой бўлиб, Назокатни дугоналарининг олдида камситиб, “гап”дан чиқариб юборган эди. Назокат душманининг касалхонада ётганидан фойдаланиб, аламини олиш мақсадида унинг уйида ўғрилик содир этишни режалаштиради.
Самариддин ўзига муқаддам уч марта судланган қўшниси Дониёр Тоҳировни шерик қилади. Тунда Самариддин ва Дониёр Наргизанинг ҳовлисига девордан ошиб ўтишади. Дастлаб ертўлага тушиб, у ердан бирон-бир арзигулик буюм топа олмагач, ертўланинг устидаги уйга киришади. Уйдаги сейфни очишга қанчалик уринишмасин, эплай олишмайди.
Шундан сўнг, авзойи бузилган йигитлар ҳовлининг бошқа тарафидаги хоналарга ўтишади. Хоналарнинг бирида ёшгина жувон икки нафар фарзанди билан ҳамда ёши каттароқ аёл ухлаб ётганини кўришади. Ёш жувон ўйғониб кетиб, қўрқувдан йиғлай бошлайди. Дониёр қўллари билан унинг оғзини ёпишга ҳаракат қилади. Дониёр унга “яхши” ўғрилар эканини, сейфнинг калитини берса, ҳеч ким жабр кўрмаслигини” тушунтиришга ҳаракат қилади.
Ёш жувон сейфнинг калити уларда йўқлигини, уларни тинч қўйишини айтиб, ёлворади. Ўғрилар эса уйдан икки миллион сўм пул ва “Нокиа” русумли телефон аппаратини олиб чиқиб кетишади.
Ушбу жиноят бўйича Оҳангарон туман судида Назокат, Самариддин ва Дониёрга Ўзбекистон Республикаси номидан ҳукм ўқилди. Уларнинг ҳар бирига қонунда белгиланган тартибда жазо тайинланди, деб ёзади “Ҳуқуқ” газетаси.
uz24.uz
